Ç'ut'a Mamçxomale!

Zuğa-uças ha3'i, enni dido na-ixenen duyla mçxomişi oç'opu ren. Heti enni k'ai, ham tutapes, ini na-var ren şeni, zuğa dido na-var irden şeni iven. Çxomişi oç'oputi enni k'ai, çkineri Mamçxomalepek ikoman.

Ha3i zuğa-uças enni dido na-içinapen kapça do siak'işi ora var-ren. Zuğa-uças, ham oras barbuni, k'efali, istavrit'i mezgit'i ren do hemtepe içopen. Zuğa-uçaşi mçxomepeşi dido na-ren pe didi do gunz*e mosapeten iç'openan.

Didi-mamçxomalepek k'efali do barbuniti mosaten ç'opuman. İst'avrit'işi oç'opu; Ç'ut'a-mamçxomalepek

na-ikoman steri ank'esitenti ixenen. İst'avrit'i, zuğa-uças k'at'a oras ren, k'at'a oras iç'open do k'at'a oras iç'k'omen. Nostoneri ar mçxomi ren-do ç'ut'a mamçxomalepek heya misinas dido svareri, k'oreri ank'siten ç'opuman.

İstavrit'işe oxtimu şeni didoten tanoras eyselen do ç'ut'a k'aravepeten (  feluk'a   )  zuğaşe amilen, istavrit'i na-iven 3'k'aris, istavrit'işi 3'k'ari itkven. Ham mçxomi enni dido zuğaşi ham 3'k'arepes iven. İstavrit'i, ndğaşi ordo orapes do olumcuşi orapes, ank'esepez 3'ip'i mçxomi yado k'ai nolams.

İstavrit'işi oçopuşi ank'esepe do misinapeşi iriz arte, tak'imi itkven. Heya otxo k'ele ok'oç'k'aderi ar m3'ule pi3arişi muntxaz misina ko goik'oren. Hemtepeşi meonas ç'ut'a mçipe misinas ank'esepe Vit'ojur, vit'ojur santimite meoneri svareri dik'oren. Ank'esepesti mçxomiz k'ai az*iraz do 3'ip'i mçxomi da3'onas yado zuğa-k'inçişi kçe toma, vanati çkva muntxanepeşi peroni tomape mk'ule mk'ule konik'oren. Ank'esepe mek'oru şeniti mç'ita nok'epe ixmaren. Mç'ita nok'epeti na-iç'opasen mçxomepes, 3'ip'i çxomepeşi ğvanç'k'ili da3'onen.

Haşopeten, na-ptkvi steri ordoşen feluk'apeten zuğaşe amilinem. Zuğas na iç'opasen mçxomişi 3'k'ariz ko didginen. ( Zuğaşi dido mçxomepek çkva çkva 3'k'arepes ivenan)

Hek, pi3arepes 3oneri ank'esepe tamo tamo, meona meona i3'k'en, 3'k'ariz tudele ordo gextas yado ank'esepeşi tude monk'a k'urşuniti nik'oren do ank'esepe zuğas ko dolin3'en. Zuğaşi doloxe, mç'ita nok'epeten k'oreri kçe tomoni ank'esi 3'ip'i mcxomi na da3'onen istavrit'ik, 3'ip'i mçxomi gyebişkva yaşi ank'esis ko nik'iden. Ank'esis mek'ideri mçxomişi opatk'alupe misina na-ok'açun mamçxomalek k'ai oxo3'onaman. Tamo tamo misina jin feluk'aşe komoizden. Misinas mek'oreri do meoneri svareri ank'esepe feluk'aşi jin keiğen. Ank'esepes k'ideri istavrit'epe, patkaleri patkeleri ank'esepeşen ko ni3'k'en do mçxomepe Feluk'aşi doloxe kodolibğen. Tak'imi zuğaşen ar eşanç'uz, zuğas mçxomi dido renna do ank'esepes k'ai nolams-na, k'at'a ank'esi mçxomiten opşa ko mulun. Dio orapes k'at'a fara sum-otxo, otxo-xut k'onari mçxomi oiç'open.

Haşopeten ar mamçxomalek jur-sum saat'iz 15-20, vit'oxut-eçi kilo k'onari mçxomi oç'opums. Hamtepeşi dido naren ko-gamaçams do skidalamuşis nuşvels. Dio Mamçxomalepekti na-ç'opanoren hak'o mçxomişi ar-ç'ut'a nerenpe oxori-muşişe mendimers. Na-doskidasenpeti malte, megabre do oput'enepes durtams.

Ma ar, ç'ut'a-mamçxomale k'oçi na-bore şeni,  zuğa-uçaşi mçxomepeşi oç'opu kai miçkin-ma, do-matkven. Haya ma xvala miçkin-ma-ti var bz*op'on. Zuğa-uçaşi k'elas na-skidunanpe do ham duyla na-oroman dido k'oçepes hamtepe kuçkin.
Ham duyla şeni nak'o 3'aneri ret-na t'at hek'o beciti var-ren, iris daxenen.
 
İstavrit'işi oç'opu, xvala ar mçxomi oç'opu var ren. K'ai t'aroneps zuğaşe amaxtaşi, Hek, Zuğa, n3a, feluk'a arti si, ti-skanite re. Hek ar k'ele mçxomi ç'opum, ar k'eleti mendraşen na-iziren didi germapes do noğapes o3'k'er. Hemuşan çkva do k'ai ar sotis k'oçişi tişi-doç'k'inde moişvancineni..

Ham na-p'ç'aripe, mçxomişi oç'opu ha3'i didopes kuçkin. Ma hak, mçxomişi oç'opuşi çkinapa, Lazuri nena-çkuniten p'ç'ara-ma ptkvi. Hak, mçxomişi oç'opus steri dido muntxanepe Lazuriten artikatis oxobo3'onapeten, mebiç'araten.


Didi moşvacinale-tkvani k'ai do na-ginonan steri gologixtan.


Lazona


Tanora

(by {mos_ri} )