Lazonas, ora-muşis iri ham tkvala bognamt. Hayde… çayişi o3’iluşe... İpti Lazonaşe k’aoba do mskvanoba na moiğu çayik, ha3’i on3’orinuşen çkva mutus var ipelen. Hemuşi oras mteli Lazonas tanut’aşi eiselinen, ordoşen çayi oişven do çayişi ont’uleşi gzas ko geidginen. Mç’imas, mjoras na i3’ilen çayi on3’orinuşen çkva mutu var ren, k’at’a oras çuçuna do mpula motferi t’aroni var iz*iren.
Çayişi ont'ules, şka mondrik’eri, xes çayişi makasi, jin çayişi dolokunuten na-geiç’k’en çayişi o3’ilu ondğeneri gyari şeni na-niçen moşvacinuş şkule lumcut’aşa, m3’k’uput’aşa nionen. Ham oraşi doloxe xvala çayişi mak’asiz na-dolobğun çayi, er k’ele na gyorçun çayişi boxçaşe dolobğu şeni ti do şka e3’izden. Haya, hek’o perpu duyla var ren. Ar-jur saat’iz çayi 3’iloms steri dodgitit do muç’o ivasen hem oras oxo3’onaten.
Na-i3’ilen çayi boxçapez gyeibğaşi boxçape, çayi mot-iç’vet’as yado var ok’ik’oren. Mjora na-var gyo3’k’en ar svaz ko dirçen do çayi hek ko goinpinen. Haşoten çayişi-eç’opinale gyeink’olent’aşa ar saat’i oğune çay gonpineri na-ren boxçape k’ai dik’oren do çayişi ont’ulepeşen va mxuciz eidveri, vana k’ap’ulaz mok’ideri vanati gza ko ren-na, çayişi arabaz geydveri, hem doç’k’ideri xalite çayişi-eç’opinalepeşe dizden. Hemindos şkule m3’k’put’aşa ç’umanişeneri çayişi o3’ilus nionen.
Haşopeten, otanuşen m3’k’uput’aşa na-i3’ilen çayepete, çayişi-eç’opinalepeşe mendilen. Hek k’at’a oput’enepek na moiğez boxçepete k’oreri çayepe kok’ibğen. Muşişen oğune çayi na-meçamspe dido ren-na, çayi mot iç’vet’az yado boxçape ko goin3’kendo heşo mutepeşi çayişi eç’opinuşi ora oçvimuz ko gyeiç’k’inen. Hek ekisperepe mulun do boxças na-gyobğun çayiz gyoç’k’en. Na-i3’ilu çayis, tipi do t’ot’i unt’alunna hemtepe goşoğapams, haşoten xoloti çayi xeten tipi do t’ot’epe di3xunen. Ekisperis çayi ko mo3’onduna çayi amoğapams do do3’onapams. Çayi boxças gyebğeri di3’onaşi boxçaşen çayi eç’opinaleşi doloxe ko dipinen. Ham oraşi doloxe didopek hek’o on3’oruten na-3’ilez çayi mçxvapas oçvimuten mteli daç’venan do mexuman.
Edo.. çayi, çayiş-eç’opinalepeşe iğinaşi hek eç’opinalepe opşa ren-na hem orasti xoloti oçvimupe ko gyeiç’k’inen. Eç’opinalepeşen çayi fabrik’apeşe oğu şeni k’amiyonepeşi moxtimu şeni xoloti içvinen. Yano orapes k’amiyoni moxtaşi hek, 3’ileri çayi meçamu şeni na-çvumenan biçepe do komolepek gabğenan do eç’opinalepes na molobğun mcveşi çayi k’amiyoniz ko mok’idaman. Kamiyonik eç’opinale moçodinaşi hek na çvumernanpek çayepe do3’onapaman do ko gamaçaman. Edo na gamiçinen ham çayişi gyeç’areri mundes niçasen. İptineri çayişi gyeç’areri dido var iyanen, ç’ut’a ordoşen ko niçen. Majurani  do masumani fara na-i3’ilen çayepeşi gyeç’areri mundes niçasen, mitis hemuşi ora var açkinen. Mundes gaşinanoren, mundes gyaç’areri avanoren, hem oras meçanoren, hak’o k’oçik na-çvumers çayişi gyeç’areri. Do hem oraşa na-ndğulun çayişi gyeçareri şeni çkar monz*inuti var ikoman do çayişi gyeç’areriten na-skidunanpe gemzuli ko dut’aluman. Hakşa xoloti ç’ut’a t’az nati na-ivenpe k’ai rt’u. Ç’e… kşunani? Çayişi gyubrepe moxtimuşen oğune, şuk’apes, lazut’epes mteli ont’ulepes na-iven oç’k’omenepes muperi şura do nostoni avet’u? Ha3’ hemtepeşi çkari 3’oxleneri steri var-ren.
Art çayişi enni beciti muntxati kontenjani ren. Çayişi eiç’opinuz geiç’k’as şkule aşvaciz komtenjani yado ar mutu ko gamiğinu. ( kontenjani; ar donumiz xut vanati vit kilo çayi megaçen steri) Hak’o on3’orinuten na-i3’ilen do eç’opinaleşe na-iğinen çayi, Kontenjani ko gyoçk’una, hemindos şkule gamaçamuti prolemi iven. Kontenjani vit kilo renna ar donumi şeni ne gamagaçinen çayi vit kilo iven. Xut donumi çayiş ont’ule na uğun ariz na-naçen çayi jurneçidovit kilo ren.
Edo 3’ileri hak’o çayişi kontenjaniş şkule na-doskidun pe mu ivasen? Çay K’uriz na-var niçen çayişi genoskide, va kontenjanişi ora şak’iz çayi na-oçodinespeşi k’arnes niç’arasen, vanati ozel sektorepeşi fabrikapez niçasen. Kontenjani muşeni gamaxtu; Ma na-oxobo3’onam k’onari, kontenjanis sum muşeni-uğun. İptineri; dido çayişi ont’ulepe na-ixenu şeni, na-ixenen çayi dido ren do heya Turkiyes dido muxtams, oxmaruten var içodinen. Vanati na ixenen oşvimoni çayi var ipelen do Turkiyeşi Galendo var-gamiçinen.
Majurani; Turkiyeşi galendon na-mulun çkva devletepeşi, gyeç’areri muşi dido ç’ut’a na-ren çayepe ixmarinen do çkuni çayi var-gamiçinaşi kontenjani gyoç’k’ams.
Masumaniti; Na-i3’len çayepe ozel sektoriz niças yado kontenjani gyoç’kams do çayi Na-uğunanenpe hek meçamuz nikaçen. Sumuti k’ai ar mutu var-ren. Sumi şeniti mutu oxenu uk’ors. Haya çayişi gyeçareriten Na-skidun, vanati çayişi gyeçareri skidala muşişi gelaşvalu na-avenpek çvumernan.
Çayişi o3’ilu, çayişi gamaçamu muço ren, çayis gyeçareri mundes niçasen na-var içkinaz nati hemuten muç’o skidala ixenen na-var uçkinanenpes gamabucoxum…
Hayde… çayişi o3’iluşe… Moxtit!
30.05.2007, Lazona
Tanora
|
Bu Yorumu Feed ekle
Yorumlari Göster/Kapat
Yorumlari Göster/Kapat
