|
Çevrecepe Şk'ala Cur Ndğa |
|
|
|
Selma Koçiva
|
|
25.05.2007 I 14:16 |
 M3eya
çevrecepe kok'ik2orobedot'u do ma ti hini şk'ala bot'i.
Karadeniz Fikir KlüpleriPlatformu' Karalahana Sitesi na iz'ires Zuğauçaşi
tişinerepe do cencepe ok'ok'irobes.KFK şi misinapule Bahriye
Şengün'i şk'ala mendrale yoxoşa karti
karti biçinamt'itu.
İst'anbolişa
moft'ido var tilifoni dobuxeni. Kobiziritu...Xelineri bisinapitu do na bikumtu dulyapeşi karti
karti mebusinapitu.
Bahriye şk'imi k'uşağişi ar oxorz'a ort'u.Zuğauçaşi
oropa guri dolodveri T'ramt'ra(Trabzon)
na mirdu ar manebra ort'u...Huşa T'ramt'raşa ar nena moxtasen dei biyondramt'i
dei elebat'i.
Mancurani
ndğa ar K'onferansi kuğut'es. [[Çernobi]]lin Sonuçları ‘ yoxo cedveri ‘..Çernobili guri ‘ yoxo cedveri ar belgeseli
o3'iranet'u. K'araköyi ‘Tutun -deposu' yoxo
cedveri ar Konferansşi oxomondule (saloni)..K'onferansi Karadeniz Fikir Klüpleri Platformi do
Heinrich Böll Vakfı Derneği - İstanbul Şubesi organize uy.Heinrich Böll vakfi
Derneği almani çevrecepe na cedgu ar
didi vakfi oren.1972 3'ana nobel edebiyat oduli na eç'opu iri na
içinams almani mamç'arale(yazar) Heinrich Böll'işi yoxo uğun.
Mendaft'itu
mancurani ndğa.. Na mextespe cencepe do oxorzalepe daha zade ort'u... .Enogi
ncini k'at'i resim sergisi kogoft'itu..Resim sergisi Çernobili tva3ala şik'ule
na ek'ask'udupe o3'iramt'u...gamak'aleri oxorepe do na molazun mutonpe .Oyincağepe
k'apepe t'axeri .mobilyape do mutonpe..Koçi guri ini dvayen .Gomsk'uditu.
Uk'aşxe
paneli kort'u.'Çernobilin Sonuçları' yoxote.
Programi
ciç'usi:
Enogi ‘Çernobişişi Guri' yoxo cedveri belgesel
filmi ko3'ires.Yonetmeni amerikanuri
oxorz'a Maryann De Leo komext'u dort'u. Edo konisinapu .'Çernobili şi guri' yoxoni
belgesel filmi Çernobilişa 16
3'ana şik'ule dozdes . Heko na ek'ask'udu berepe şk'ala hinişi ozabunu
do osk'edini o3'irams. 2004 3'ana eni vorsi
belgesel filmi diyu do osk'ari keç'opu.
Belgeseli
şuri umozdu kobo3'editu. Haşo mutu diyeni. Çernobili eni zade berepe na
mvat'u komaz'ires ar daa.
Uk'aşxe
fotoğraf sanatçisi Christophe Bissoni fotoğrafepe
muşişi disinapu. Aprili 2006 na dozdu Fotoğrafepe heko na ek'ask'udu oyincağepe şeyepe
nç'arelepe mutu z'iru. kodozdu.
Çernobili
şik'ule Zuğauçaşi k'anseri derdişi disinapes.Uneneli dobiyucitu.
Çek fotoğrafçi Vaclav Vasku fotoğraf sergisi şeni
disinapu Him Çernobili na aziru şurepe şk'ala içalişu do mutu ağodes
fotoğrafepete komo3'ires.
K'onferansi inglizuri ti na isinapinet'u şeni simultani
tercume kort'u.
Bazi
moşvacu şeni ncini k'at'işa
kebulurt'itu. Vak'ifi oşvoni mutonpe doxaziru dort'u.
Ham
K'onferansi profesyoneli ar organizasyoni mo3'iramtes.
Curoni
paneli mamç'arale İbrahim Güreli (Çevre ve doğa tı koruma konularında yazıyor
daha çok, Radikal Cumhuriyet vb) masinapule
ot'u...Na isinapes: İnci Gökmen (Ortadoğu Teknik Universitesi) ,Myccle
Schneider Uluslar arası nukleer politika danışmanı-Paris, Roland Kobia -Avrupa
Birliği-Brüksel Nukleer enerji
politikapeşi disinapes.
Uk'aşxe
Ulrike Dufner (Heinrich Böll Vakdı Derneği başkani) mutonpe komemisinapes do 21. Aprili 2007 na iyu K'onferansi diçodu.
Karadeniz
Fikir Klüpleri şi na va biçinamt'i ar bozonta
mext'u ali kodolomabu. Kinçi st'eri patxaleri bixeli.T'ramt'uri (Trabzonlu)
Bahriye do arkadaşepe muşi didi duyla ko
go3'idves. A k'ale ti Sinopi oxenu guri na uğunan nukleer santarali ceşalu şeni
imza kampanyasi uğut'es...Çernobilişi ora Zuğauçaşi noğapeşa na goyibğu ağu do m3xilepe k'oçepe şk'uni
muperepe ağodes. Huy muç'o iyen , nukleer santrali oxenu guri uğunan var
oxobo3'onamtu!
Mancurani
doloni(xaft'a) 28.Aprili 2007, ‘Kuresel Eylem Grubi' çevre problemepe şeni
gzala(yürüyüş) do ok'ok'orobu(Mitingi) uğut'u..İnternet'işa kodiyoxu do 70 tane
organizasyoni imza komeçu ham doyoxuşa.Mitingişi sva Kadikoyi meydani ort'u.
Manebrape şk'ala mendaft'itu. 300/350 şuri ancaği ort'u.Mitingişi zeni goğobeş
do kogomigores şik'ule amvoşk'umt'es.Hako ti cencepe do oxorz'alepe zade
ort'es...A cur platformişi temsilci
disinapu:
[[Findikli]]
Derelerı koruma Platformu
Dersimde
munzur suyunu koruma girişimi
Sinop
da nukleer santrale karşı girişim
Malatyadan
bir grup çevreci
Turketişi
iri svapeşa çevrecepe ok'ok'ateri kort'es. Çevrecepe disinapeşik'ule Vi3'uri ar
muzik grubi sahneşa komoxt'u...Cenci
solist'i ramet'li Kazimi st'eri tomalepe keyipinu do guda oç'andrineri grubi
muşi şk'ala [[Lazuri]] Turkuli dot'rağudu. T'ulumi nena te Kadikoy meydani gongutu.
Şku manebrape şk'imi şk'ala xoroni
cep3'opxitu..Hak'u m3ika eylemcite ham meydani iyeni?Çevrecepe haşo xvala moy
orenan.?
Ey
cidi eveluri ogzalape do ok'ok'orobupe.1977
şi Mayisi ndğa komşun.Curndğa şik'ule ejdoviti 3'ana muşi iyasen him
din3xiryari Mayisi ndğa.
1979 i 3'ana
Mayisi ndğa hako biz'iri dot'u.Him 3'ana oxori molaxuneri
golilu dort'u Mayisi ndğa.Sikiyonetimi ort'u.Cur ndğa şik'ule xolo Mayisi ndğa
isyasen. Ma İstanboli bore.Taksim
Meydanişa olvoni bore.!
Huy
xoloti İst'anboli bore.
Ndğalepe muç'o golulun var oxobo3'onam.
Oxorişa gamaft'a Zuğa mazin so bore koxobo3'onam.Berobai şk'imişi oroperi
İst'anboli.Haydarpaşa -Pendik tireni cepxedasi 1978 ndğalepeşa mendebulur mezmoneri..Guri paluri
kodolomilams biçver komebozmor domdğulur.3'anape muç'ote golast'u haşote:
Lazona doTurket'i mezmoneri.Eça 3'anape şk'imi Almanya na golaxt'u mom3'upineri
ndğalepe.
[[Lazepe]]
şkuni çaint'işi metropoli İst'anboli ci3'opxes. Lazona şa ti mapxa ora ment'obineri ment'obineri ulunan.Himora şk'uti kulturi
dulya şk'uni hako ham noğa cep3'opxaten.Hakole Lazonaşa çona hakole mebotanaten.Munde
Zuğauçaşi derdepe gamabsvaraten,munde let'a şk'uni xe şk'unite pxaçkaten
p'k'onaten him ora Lazona şa ti bidaten.
Lazuri
nosoni şk'irepe soti orenan, şk'u ti heko biyaten.
Ti
do ti ok'obdvaten ok'obisinapaten.
Makalenin Türkçesini okumak için tıklayın
[[Selma Koçiva]]
30.Aprili
2007, İstanboli
Lazuri editori: Mecit Çakırusta
Lazebura.net(.com)
|
Selma Koçiva |
| Yazar Hakkinda: |
| |
|
Bu Yorumu Feed ekle
Yorumlari Göster/Kapat
Yorumlari Göster/Kapat
