Lazonaz ha3'i ar semboli ren, çayi. Dido ora var ivu, 1950 3'anape rt'u, Lazonaşe galendon ar muntxa moxtu do Lazonas hem oras şkule kultura-muşi, skidala-muşi dido ikturu.
İpti irik, haya mu moxtu, mu noren? Dido k'ai var oxa3'onu; Ont'ulepe, onape muç'o ixaçkasen, muç'o dirgasen, muç'o irdasen, omralu şeni tasi solen iz*irasen? Mşkeriz na nugnams ham ç'ut'a ncaşi but'k'a muç'o i3'ilasen, na-i3'ilasen ham çayişi but'k'ape so niçasen? Steri ar dido na-var içkinen k'itxape gamaxtu.
Lazepe dido çkineri k'oçepe renan. Aşvaciz, ham na-var içkinenpez şeni gzape ko z*ires.
Onapez, ont'ulepez na-ren ncape, ntxirepe, mt'k'ape dik'vatu, lazut'epe di3'k'u do çayişi ont'ulepe divu. Omralu şeniti, çayiz na-iven tasepeti, na-moxtasen 3'anape şeni dotasez.
Haşoten gyeiç'k'u çayi k'ala arte skidala, Lazonas. Hem ora şakiz, Lazonaşi komolepeşi dido na-renpe Lazonaşen gale ulurt'ez do skidala-mutepeşi şeni dulyape ikomt'ez do gyeç'arerepe mogamt'ez.
Çayişi iptineri orapes, iri xolo dido k'ai rt'u, Lazonaşi skidala dido ikturu, Lazonaşi komolepek gale na-ikomt'ez dulyape naşkvez do dobadona mutepeşişe goiktez. Vanati hem oraş şkule gale na-ren didi-noğapeşe var-idez.
Çayişi ont'ulepez na-3'ilez çayişi gamaçamuten skidala-mutepeşi domskvanez, Lazonaşe k'aoba moxtu, Koçinoba şeni na-uk'ors, çkva dido muntxanepeti komoxtu.
Haşoten, Lazonaşi kulturaşi ktura-ora ko gyoç'k'u. Çayi ipti xeten, jur-dogveri but'k'a i3'ilu. Na i3'ilen ham çayi xvala k'urump'i na-rt'u şeni, hamuşen dido k'ai oşvimoni çayi gamulut'u.
K'at'a oput'epeşen çayişi madulyapek na-3'ilu çayepe, t'ik'inape, k'alatepete izdet'u do k'at'a noğapez ar-na-ren çayiş-eç'opinalepez, na-i3'iletu çayepe gemiçinet'u.
Çayişi eç'opinuz gyoç'k'imuşi ipti oras çayiz, ar kilo xor3işi eç'opinuşi gyeç'arerişen dido gyeç'areri niçet'u. Noğa-çkuniz xor3i, 2,5 lira rt'uşi, çayişi kilo 2,75 lira rt'u. ( 3'oxleneri lira ) Haşopeten dido orape golaxtudo, çayişi ont'ulepe irdu do irdu. Na-ren germapeşi rak'anepesti çayepe ko dirgu. Na-moiginet'u çayişi gyeçarerişi didonobak, Lazonaşi skidalaş mtiniti ar şuri meçu.
K'at'a oput'ez jur-sum çayiş- e3'opinalepeti ko goin3'k'u. Ok'açxe xeten o3'ilute, k'itepez na-dolik'nimetu çayişi peri tamo tamo gondunuz gyoç'k'u. Muşeniki hek'o çayişi-ont'ulepe ivu-do, çayişi-but'k'a xeten o3'uluten var niç'işinu, var içodinu.
Hemuşeni çayi o3'ilu şeni, çayişi o3'iluşi mak'asepe gamaxtu, xeten xvala k'urump'i na-i3'iletu çayiz, t'otepe kant'alu, haşoten na-var ipelen çayi gamaxtimuz ko gyoç'k'u. Ozdu-muşiz t'ik'ina do k'alati var yanç'uşi, didi boxçapes omçikeri izdu. Turkiyez dido na-var ixmarinen çayi Turkiyeşi galendonti var gamamaçez.
 Ham orapeşi doloxe ozel sektori yado çkva k'oçepek ti çayişi fabrik'ape gon3'k'ez do hemtepekti çayişi-but'k'a eç'opez. Çayi na-uğunanpeşi diopek hamtepesti çayi ko meçez, edo gyeçareri mutepeşi mundez eç'opanoren çkar var-açkinez. Hamtepez çayi mitik var-meçaşiti, Çay-K'urik aşvaciz k'ontenjani yado ( ndağs, xut - v'it kilo steri) ar mutu gamiğu. Haşoten k'oçepe,
na-3'ilez çayi, ozel sektorişe meçamuşe mekaçuz ko geiç'k'u.
Xaşopeten lazona şeni dido k'ai mutu na-ren çayi, gamaçamu do oxmaru muşi dido na-var iven şeni, arti dido ont'ulepe na ixenu şeni, tamo tamo iptineri mskvanoba muşiz dok'luz ko gyaç'k'u.
Ha3'i çayişi o3'ilu, gamaçamu, na-gamiçinen çayişi gyeç'areri e3'opinu dido didi problemi iven. Çayi o3'ilu şeni didoten noderepe iven do ar oput'ez na-skidunan maltepek artikatişi çayi o3'ilu şeni bedelepe ikoman. Haya, mç'imaz, mçxvapaz, t'enoni do şetxi t'aronepes na-ikoman şeni dido ozabunupe iven. Çayişi gamaçamuten na mogaman gyeç'arerişi dido na-renti doktorepez do ç'ami eç'opinuz ko meçaman. Didopekti çayişi-madulyape, ndğa-gyeç'areriten okaçaman do çayi o3'ilapaman. Haşoten, çayi na-uğunanpek na-eç'opuman gyeç'arerişi gverdişe na noxols na-renti hemtepez ko meçaman. Arti hamuz gubreşi gyeç'areri ko dik'laşi şkule xes mutu var doskidunan.
Na-i3'ilen do na-gamiçen çayi Turkiyeşe gale var gamiçinaşi, Turkiyeşi doloxe dido var ixmarinaşi hukumetepekti hamuz dido gyeç'reri var meçaman. Han3'o ar kilo 3'ileri çayiz 63 krş do mem3xveri 9 krş niçaşendoren, haya mitis, mutus var ubağun.
Arti enni becit'i, enni p'at'i na-ren ar muntxati, oşvumoni çayi Turkiyeşi galendon na-mulun ren.
Haşoten, çayişi gyeç'areriten na skidun dido k'oçepeşe ar p'at'inobati ixenen. Haya dodginu uk'orams.
{sidebar id=1} Turkiyeşi Didilepez hakşen gamabucoxum! Na-ixenen ham dulyate Lazonas do zuğa-uçaşi k'elaz na skidunan k'oçepe şeni dido k'ai mutu var iven.
Maçayalepesi, k'vaşi-upi mot gondunut'as. Dido Lazepek do çkva Xalk'epek çayişi-but'k'aşi gyeç'areriten skidunan. Hamtepe, xvala didi-goşağinaleşi (seçim ) oras, ar reyi ren yado mot z*iromt'an, heya k'ai mututi var ikoman...
Mteli k'aobape, k'oçinoba şeni na-ixenen, ar Sva-mogvaleşe şa...
23.05.2007 Lazona
Tanora
Lazebura.net(.Com)
|
Bu Yorumu Feed ekle
Yorumlari Göster/Kapat
Yorumlari Göster/Kapat
