Lazebura | Nenaskani - Lazlarin Internetteki Sesi, Lazca ve Lazlar

Lazuri Ncaraona

Babaşi Nosiş-tkvala!

Osman Şafak Büyüklü

16.05.2007 I 11:18

Badi ar Lazi ğuraş-oncirez gyecant'uşi, bere-muşiz ucoxums do sum nosiş-tkvala (öğüt) meçams.
1-Ok'açxe z*ireri zenginişen, vaşa gyeç'areri dak'vanda... 2-Hukumetişi k'oçi k'ala, vaşa megabre diva... 3-Oxorcaz-skaniz vaşa didi mpuleri-tkvala (sır) mot meçam, u3'vudoren.
Berek mteli hamtepez "Ho, baba çkimi"u3vudoren.
Edo dido ora şkule mteli hamtepe oz*iru şeniti nosi var mok'ağen... Bo3'k'edat, babaşi nosiş-tkvalape mtini ren i?

postamble()
Ar ndğaz, ar ntxa ke3'opums, t'k'obaşa heya nok'vatums do t'urvaz ko dolobğams.
Gemzuli, gemzuli oxorca-muşiz.

"-Oxorca... tiz ar p'at'inoba komomixtu... Ar mintxa doboğurini, memişveli do ham ğureri k'oçi ar soti gomndinat" u3'vudoren.
"-Mot igemzule" tkvu doren oxorca-muşikti do " moiği heya oxorişi tude let'a pntxorat do hek kodoboxvat" do na tkvez steri dovezdoren.
Haşopeten orape golilu şkule, ar oras k'oçik, na-z*iru ar polisi k'ala megabre divudoren. Hemu k'ala na ipxort'ez do na şvumt'ez iri arsoti ulut'u do Cuma steri divezdoren.

Ok'açxe-z*irameri ar uz*iramu zenginiz, ok'açxe meçamu şeni gyeç'areri ko yuç'opums.
Hemindoz şkule, na-vu muntxanepe muç'o ivasen yado oçvimuz ko gyoç'k'udoren. Ndğalepeşi ar ndğaz oxoriz ç'ut'a ar muntxa şeni oxorca-muşi k'ala ok'ak'idez doren. Oxorcak k'oçiz, iri jindo jin, nena notkvamt'udoren. Çkar, ti do nena var moizdamt'u doren. K'oçiz şuri nakaçu şkule oxorcaz ar k'ap'et'i ko gamudgudoren. Oxorcak ti na-auren k'o ouruz meçu doren do,

" -Memç'işit Maltepe... komoli çkimik ar mintxa doğurinu do let'az ko doxvu" Ouru na ognu Megabre na-ren polisik darçineri moxtu do k'oçiz xepe kok'uk'oru doren. Xe ok'ok'oreri gzas ulurt'eşi k'oçik, polisiz.
"- Hak'o oraz skani k'ala Cuma steri boret... megabre-çkimi re... xez ç'ut'a ok'oreri koxomişkvi... dido omizdu, xez domaç'vu." uç'vudoren. Polisik, haya na uç'vuşe ti k'oçişe dişumudoren.
"- Ğeci k'oçi... ok'ok'oreri xe ok'o3'k'u mu tkvala ren... Si oğurinoni re." Yado umğorudoren. Xe ok'ok'oreri Hakimişe k'ele ulurt'eşi hamtepe na z*iroms ok'açxe-z*irameri zenginik k'oçis aliz kodolak'nudoren.

" -Çkimi gyeç'areri var momçaşa soti var galen... oncğore na var uğun k'oçi" tkvu doren.
" -Mo3'k'edi, mz*irom... tiz ar p'at'inoba momixtu... Hakimişe mebulur... Ha3'i skani gyeç'areri var memaçen... Hakimişi xeşen mobuşletaşi mekçare... ha3'i ma oxomişkvi." Yado axve3'odoren ham ok'açxe-z*irameri zenginiz.

" -Var iven... xe çkimişen var gamt'inen" tkvu doren do hemukti, hemtepez Metxozineri, hemtepe k'ala Hakimişe igzaludoren. Hakimik kitxu doren.

" -Mu şeni oğurini hem k'oçi tkvi ha3'i?"
"- Ma miti var boğurini k'adi-çkimi... Ham dulyaz isa na-var ren ar muntxa ren."
"- Heşo i? Ehe... tolepe-muşiten na-z*iru, oxorca-skani... hemuşeni mu tkvare"
"- Hakimi-çkimi, Baba-çkimi ğurut'u-şkule ma sum nosiş-tkvala momçu. Ham

{sidebar id=1} Nosis-tkvalape mtini reni? oxo3'onu şeni ar ntxa mebok'vati... t'urvaz dolobdvi do oxorca-çkimiz ar k'oçi boğurinima bu3'vi. Arte, oxorişi tude let'az ko doboxvit. Hemindos şkule hukumetişi-k'oçi naren polisi k'ala megabre bivit. Okaçxeti, ham ok'açxe-z*irameri zenginiz, ok'çxe meçamu şeni gyeç'areri ebuç'opi. Oxorca-çkimi K'ala ar ç'ut'a ok'ak'edinuz şkule ma kok'omit'alu, megabre polisik xepe kok'omik'oru Uz*iramu-zenginik aliz ko gyemak'nu do hak mobulurt'işa var oxomişkvu.

Babak na momçu nosiş-tkvala mtini na rt'u haşoten ko bz*iri, koxobo3'oni"
Ya u3'vudoren. Hakimik k'oçişi oxorişe idu do oxorişi tude, let'az na oxun ntxaşi xor3i dolobğeri t'urva z*iru şkule iz*i3inoms, k'oçişe goykten do:
"- Aferun skani ğureri baba-skanişe. Dido mtini nosiş-tkvala mekçudoren. Çkar oraz baba-skanişi nosiş-tkvalaşen mot gamulur." u3'vu. Cinikiz xe mudvu do k'oçi oxuşkvu doren. ( Ma hak mitis gyek'itxu şeni var p'ç'arum, mitik mot gyagondut'as )

Ham na-p'çari teksti, M.Vanilişi, A.Tandilovak na ç'aru "Lazların Tarihi" şen Eyzdimeri ren. Ma, xvala hek ç'areri na ren steri Lazuri nena-çkunişe gyekpturi.
Hak, ha3'iz şkule, xoloti haşo Lazuri nena-çkunişe gyekturapeti p'are.

Tkvanti k'ai nosiş-tkvalapeşi k'ap'ulaşen natxozit, k'aiten skidit.

16.05.2007 Lazona

Tanora

postamble();

Osman Şafak Büyüklü
		Yazar Hakkinda:
		Yazar. laz kültürü ve dili adına haftalık lazca makaleleri ile laz dilinin zenginleştirilmesi ve özellikle gençlerin lazcaya ilgi duyması açisindan önemli katkı sağlıyor.