|
Na Minon Haya Ren... |
|
|
|
Osman Şafak Büyüklü
|
|
08.05.2007 I 23:29 |
Da-cumalepe... megabrepe... mak'itxalepe... Ma na-minon mu ren giçkinani?
Ma hakşakis na-p'ç'arumpete, Lazuri nena na-oromanpe do k'ai na-var uçkinanpes do ham nana-nena çkuni monzinu şeni na-ibodenanpes Lazuri nena-çkuni doguru şeni, Lazuri nena booropina mado p'ç'arum, oç'aruzti mebuonare.
Lazeburas oç'aruz muşeni gyeboç'k'i? Ham site-çkunis Lazuri kultura do Lazuri nena na-oroman mteli Lazepe hak ok'obğaleri na-ren şeni ren.
Lazuri nena ok'itxu do oç'aru na-uçkinanpes şeni otkvoni dido mutu var ren. Hemtepekti na uçkinan Lazuri nena-mutepeşiz xoloti munzinan. Arti, Lazuri nenas na-yodgin, ham duyla k'ala na-iboden Lazi mamç'aralepe ren. Hemtepek ham gzas nuonan, vaşa na-ikoman ham mskva duyla mot met'komert'an, vaşa mot gyegondut'an, mot meç'irdut'an. Na-ikoman ham duyla, ha3'i hek'o dido beciti var ren, ç'umanişenepes, na-moxtasen orapes, na-ikoman ham dulyaşi becitoba oxi3'onasen. Hem oras na-ves ham duyla dido k'ai içkinasen do moi3'ondinasen. Çodina na-var ren orapeşeşa, Lazepes ok'itxoni suparepe, tekstepe, leksepe nuşkvanoren.
Na-bikomt Lazuri oç'arupeşe xolos orapez, ağani geboç'k'it. Hakşakis Nena-çkuniten dido suparape, tekstepe, leksepe var iç'aru. Hamtepe nak'o dido iç'aras-na hek'o k'ai ren.
Mambirapalepek, birapa-mçaralepek ti ham duyla şeni beciti renan. Hemtepekti nena do kultura-çkuni iriz oropinanoren.
Dido k'oçis interneti davas-na, hek'o k'oçepe k'ala ağani ambarepe do ç'aralepe şeni muntxanepe artikatis mebiç'araten. İrik arte, isa do mtini naya ren bz*iraten, heya mebisamadaten do mteli Lazepez boçkinapaten. Haşoten Lazuri nena mteli sva-mogvaleşe gobont'inaten. Sva-mogvaleşen gont'inu şeni ipti çkun, Lazepek nena-çkuni k'ai ko dobigurat do...
Lazuri kultura do nena ren. Haya, çodina na-var uğun orapeşeşa na-skidasen, iriz boçkinapaten. Ha3'i ham duyla na-ikoms, dido k'oçi var boret, heya mtini ren. Lazuri-nena şeni Dido k'ai muntxanepe na-vasen dalepe do cumalepes manzinasen, haya miçkin, ivasen. Çkinapaşi do doguruşi oçodu var iven, 3'anati var iven. Kat'a oraz, k'at'a sotiz hamtepe dixenen, hamtepeşi oxenus mutu var noğun, haya mot gogoç'k'ondut'an.
Ma na-minon, Lazi vanati Lazuri doguru na-unon çkva xalkepeşi k'oçepek, Lazuri na-ç'arums Lazi-mamç'aralepes, na-ç'arums k'at'a mutuz ak'atan, k'itxan. Ar ç'ut'a mutu t'az nati doguru şeni ham dulyas o3'k'edan. Na-var açkinanoren, na-var oxa3'onanoren muntxanepe ren-na haya, ham duylas na-yodgin mamç'aralepez do Lazuri nena k'ai na uçkinpez k'itxan. na-unonan k'at'a mutu k'itxan. Vanati muç'o diguren ham nena. Nena na-var uğun Kulturati gverdi diven.
Enni k'ai doguru, oxorepes didilepeşi, nana do babaşi, umçanepeşi op'aramituten iven, haya mitini ren. K'at'a nenaşi doguru şeni irik hem nenaşi, nena-dobadonaşe ulun do hek digurams. Na-digurasen nenape.
Çkunti, ipti haşo pat' do oxorepez, berepe k'ala Lazuri bip'aramitat. Edo haşo ar soti var ren- na, haşo oxenoni gza varmiğunanna, ma na-ptkvum steri p'aten. Çkva gza renna tkvit do iriz miçkit'an. Ma-na ptkvum, ma na-minon irik ham dulyapeşi doloxe amaxtan do ibodan.
Lazepe! Lazuri nena Doguru şeni oxenonenpeşi enni mç'ipe punçxapeşeşa gextit do tamo tamo digurit. Alboni-çkuniz o3'k'edit, hek boncape nuk'uşen do xurxişen muç'o gamulun, hemtepe vit.
Mteli ç'arerepe ik'itxit, tkvanti ç'arit. Artikati k'ala çet'i, nana-çkuniten vit. U3'vit do mteli megabre-tkvanepekti haşo van.
Arti enni beciti na-ran ar muntxati ren. Ho, Lazuri nena-çkuni, noğa-çkunepez arçu't'a ktureri ren. Heya mtini ren, ma na-p'ç'arum Arkabişi Lazuri ren. Hati Lazonaşi majura noğapez Na-skidunanpek k'ai var oxa3'onenan, tkvalape ktureri muxtaman.
Ho, heti mitini ren, Edo ma Arkaburi nena k'ai na-miçkin şeni, çkva noğapeşi-nena hekonepe k'onari, k'ai na-var miçkin şeni haşo p'çarum. Xoloti ma mutu mk'itxatna na-maxenen, na-miçk'in k'onari tkvande meşvelu minon.
Dalepe do cumalepe, didilepe do ç'ut'alepe Lazuri ç'aralepe ik'itxit, ok'itxu şeni muntxanepe vit. Ham nena 500- 1000 (xutoşi- şilya ) k'oçiten var iven. Ham site-çkuniz dido koçi uye ren.
Hamtepeşi dido narenti Lazi ren, edo hamdulyaz ( nana-nena ) mutepeşi doguru şeni hak'onari k'oçişi ok'atuten nena-çkunis, k'ai do ordo var moinzinen. Dido Lazepez ham duyla-şeni dido anank'eni var uğunanan, na-p3adi konarite.
Hayde... dalepe do cumalepe... Lazuri nena-çkunişi doguru şeni xepe gobinzikat.
Hayde... na-p3adipe mtini var ren tkvit.
Ma, Lazi bore... Sva-mogvaleşi mteli k'oçepe p'orom, hemtepekti ma mp'oran.
Xelinadok'aobaten...
Tanora
Lazona
|
Osman Şafak Büyüklü |
| Yazar Hakkinda: |
| |
|
|
|
Kimler Online
3 Misafir Online
Online olan üye yok!
|
Bu Yorumu Feed ekle
Yorumlari Göster/Kapat
Yorumlari Göster/Kapat
