Beroba-çkimişi Lazonaz Oxor-skida-şi ( Aile ) skidala. Dido 3oxlenoraşen doni na- muluns steri, Lazepezşi oxor-skida, handğanorasti menceloni ren. Lazepek, xolos oraşa şakiz didi Oxor-skida ivez, heşo skidez. Ham didi Oxor-skidapez, p'ap'uli, nandidi, nana, baba, berepe do motape k'ala arte skidurt'ez. Ha3'i haşo didi oxor-skidape dido var doskidu. Ha3'i, hamtepeşi dido na renti, p'ip'ila oxor-skidape ren. Hek nana, baba do berepe k'ala arte skidala-iven.

Lazepek, berepe do motape-mutepeşi dido oroman. Berepe diba-daşi hemtepeşi oropa biç'i vana bozope şeni var ikturet'u, juri şeniti k'ai di3'onet'u . Haya, ham orasti, ha3'iti, xoloti haşo ren.

Nana do babak didoten oxorişen galeni dulyape ikomt'ez. T'aroni k'ai vart'aşi do inoraşen çkva oxorişi doloxe dido var dodgitut'ez. Lazepeşi, berepeşi ordu hemuşeni didoten p'ap'uli do nandidişi ivet'u. Hemtepek, motape ordam-t'eşi Lazonaşi skidalaşi mç'ipenoba, kultura do Lazuri-nena doguramt'ez. Berepek, skidalaşi gza haşopeten diguramt'ez. Oxor-skidapez p'ap'uli do nandidi varen na hemoraz, k'ai t'aronepez berepeti gale, dulya na ikomt'ez svapeşe oyonamt'ez. Hemtepez nciri muxtanşi-ti Mjora na var gyoç'k'adams ar sotiz, Jur ncaz na-gonk'idamtez ok'an3'oroniz gyonciramt'ez. Berepekti hek ont'ule do onapeşi k'elaz dulyape içode-t'aşa mskva incirt'es.

Lazonaşi Oxor-skidaz didoten komolepek galen dulyape na ikomt'es. Oxorişi dulyapez dido na var ak'atet'ez şeni, oxorepeşi doloxeni dulyapeşi didope oxorcapeşi ivet'u. Hemtepek, ar-k'ele galeni duyla, ar-k'ele gyarişi oxenu, ar-k'eleti pucepeşi o3'k'omilu steri dulyape ikomt'ez.

Lazonaşi 3'oxlenoraz naren duyla oxorcalepeşi cinikiz yoz*in-rt'u. Hemtepez, coxo na-uğunan steri "oxorca "( oxorişi-nca ) rt'u. Oxorişi oxor-k'yura didoten nandidepe ivet'u, hemtepeşi tkvala-şi iri iucinet'u do ixenet'u. Oxorişi doloxe do galendo na- ixenasen dulyapeşi ortimuşen, na-ixenasenpeşi irişi k'ap'ulaz nandidepe rt'u do hemtepeşi tkvalape ivet'u.

Komolepek, oxorepez mencelite na-ixenen dulyape ikomt'ez. Hemtepekti oxor-skida mutepeşi oskedinu şeni dulyape ikomt'ez do galendon na moxtesen p'at'inoba şeni-ti oxori çvumert'ez. İbad-aşiti oxori do gale na ren perpu dulyape ikomtez do arte-skidala mutepeşiz nuşvelt'ez.

Oçilu do gamatxu, oxorişi didilepek ho, var tkvaşa var ivet'u. Dio orapez, on3'elişi-meçkineri, bozopeşi-gamatxu do biç'epeşi-oçilu ixenet'u. Bozo do biç'ik dioropezna,

oxorişi didilepek ho, var tkvez na, bozok, biç'iz elak'atet'u do imt'et'u. Haşoten dido oraz gyegondineri na ren jur Oxor-skidaşi didilepe ok'açxe ok'i3'k'vet'ez.

Lazi-bozopez, guriz var uğun do na-var oroms ar biç'ik' omt'inuna, haya dido k'ai ar duyla var işinet'u. Haşo dulyati dido var ixenet'u Oxor-skidapez naskidunpe, oxorepez var int'raşi, oxorişi enni didi çileri biç'iz ağani-oxori uk'odu şeni xepe goinz*ikamt'ez.

Ağani-oxori ok'odu şeni oput'epez na skidun mteli oput'enepeşi iri xolok ağani-oxori ok'odu şeni hemtepez nuşvelt'ez.

Germapeşen ncaşi, pi3arişi, ğalepeşen kfaşi ozdimuşi noderepe ivet'u. Na-k'odanoren oxori şeni didi ncalepe, germapeşen mxuciz gyedvaleri zdimt'ez. Ham ncalepe oxorişi k'idapez do jin gondgimt'ez. Oxorişi jin na-eiğen didi ncalepe gondvamt'ez do hemtepeşi jin gunz*e masarepe gyodginamtez. Na-gyedgin masarepez jin tok'epe gonk'idamt'ez do oput'eni do maltepek, megabrepek, mzaxalepek na-moiğanoren bezepe, ar-k'ele languşite ok'ank'uten, ar-k'eleti tufeği ot'k'oçuten bezepe tok'epez gyok'idamt'ez. Haşopeten, na-ik'oroben bezepe, na-ik'oden ağani-oxerepez na- skidanoren p'ip'ila-oxor-skidapeşi skidalaz gelaşvalu ivet'u.

Ok'açxeti oput'enepek na moiğu gyarepe arte ok'oxedut'ez do oipxort'ez, jinti lo3ape yopxort'ez.

Haşopeten oxori na-uk'ors Lazepez ağani-oxori uk'odumt'ez. Haya, Lazepeşi enni na-mom3'ondut'u kultura rt'u. Ha3'i kultura-çkunişi mç'ipenoba na-ren haşo duylape dido var doskidu.

Haya, Lazepeşi skidala do kulturaşi ç'ut'a ar-dagi ren, haşo dagepe mot goşibğet'az do mot goiç'kendinet'az.

Xelinadok'aobaten

04.04.2007, Lazona

Tanora

Lazebura.net