Bena do P`ap`upeşk`uni

Lazepeşi kultura ( xaçka ) dido mcveşi ren. Haya na dobigurit eçi 3'ana k'onari ivu. Hakşa, Lazepeşi Kultura, nena do Lazuri op'aramitu dido k'ai na var işinet'u. Ç'ut'a bort'itşi, Turkuli nena elagaktanoren, heşo, haşo yado var mop'aramitamt'ez. Hemuşeni, ham dulyaz dido jin var eidginet'u.
Ha3'i, kultura do nena çkuni şeni muntxanepe maxenenan. Dido, taneri-Lazepek ham dulyaz yodgirnan do kultura çkuni oçxink'uz, oxo3'onuz, doguruz kogyeboç'k'it.

Hakşa na itkvet'u steri, Lazepe sotişen, mitişen var moxtez, na içkinen ( MÖ 2000- 3000 ) 3'anapeşen doni ha3'i na skidunan svapez skidez doren.

Ham svapez hem oraz K'olxeti itkvet'udoren. Hem orapez dido didi ok'ek'edinupe ivudoren, k'olxepe ko goşibğezdoren. Hemtepe ha3'i çkva svapez na skidunan Lazepe do Megrelepe Renan.

Lazepeşi kultura hem oraşen doni dido ikturu doren. Ha3'i kultura çkuni şen na doskidu, k'oderi dido muntxanepeti var ren.

Dido 3'oxlenoraşen doni na doskidupe; Mcixape, Kfaxincepe, karmat'epe, oxvamepe, lazut'i na iç'ven do ixominen kfaşfurunepe steri muntxanepeşi dolobğeri kfaşi k'idape ren. Hamtepe çkuni didi P'ap'ulapeşi P'ap'ulepek vezdoren, mitik moiğudo hak var dorgudoren. Edo hemtepez, hem orapez na rt'u menceloni kulturapeşi muntxanepet iz*iren do nusun.

Na golobilit ndğalepez, jur Megreli cumak, G. Kalandia do G. Karchava, Kortuluri İmedi TV şen moxtez, Lazepeşi mcveşi do handğanoraşi kultura do Lazepeşi skidalape şeni, Mak'riali, Xopa, Arkabi, Vi3'e, Art'aşeni do Atina goxtez, do ham svapez şeni programi vez doren. Hamtepeşi oxenu, çkun hakşa çkar oraz var gomaşinez do çkar var biozmonit.

Hamtepeşen çkva kultura çkunişen na doskidu, ha3'iti na ren, xeşi xeneri, na bixmart kultura çkunişi dido muntxanepeti xoloti ko ren.

Ham xeş xeneri kultura çkunişi didope, dido k'ai na eimt'k'e3en, k'ap'eti na ren, perpu na işfen şeni ntxirişi ncaşen ixenen. Ntxirişi nca do lat'aşi msiciten geşferi, doxunu şeni orz*ope ren. Ham orz*opeşi enni k'ai çkimi P'ap'ulik ikomt'u.

Lazut'i do ntxiri, ha3'iti çayişi ozdu şeni k'alatepe, t'ik'inape. Uşkuri, urz*eni, m3xuli oç'ilu şeni gudelepe, xen3'k'elepe. Topuri şeni didi 3'ipurepez na gyeidgen k'arvanepe. Hemtepe şeni, k'yepişi suleriten xeneri tok'epe.  Çuça do çaçi ok'orobu şeni bu3xipe, ozdu şeni ti pa3xape. Lazut'i onçxvaru şeni kfaşi xeneri onçxvamure vez doren.

Hemtepeşen çkva, ncapeşi galen t'ot'epe moizdu şeni k'ok'ai, lilvepe o3'ilu şeni xeç'k'et'ali ( oç'ilaşe ), ok'vatu şeni arguni, burç'uli, drap'ani.

Mtuti do ğecepe ont'ulepeşe, onapeşe mot amulut'an, aşkurinan yado 3'k'ar-manganape.
Mçxomi oç'opu şeni zuranepez na gyeidgen ntxirişi k'et'ep'eşen şveri lesa pe, mosaten geşferi kulexepe.

Limxana do lazuti nçalaşi oşinaxu şeni, bardepe. Lazut'i, ntxiri, mkferi steri muntxanepe mot ok'ixfet'az yado oşinaxu şeni bağupe, bağuşi memskvanuten na mulun serentipe. on3oru şeni on3orepe. Ntxiri do lazut'i, mtutepe do ğecepeşen oçvu şeni k'alivepe.

Lu oncaxu şeni k'orzape, mja onçaxu şeni onçaxalepe. 3'k'ari do mja ezdu seni K'op'a pe, ozdu şeni k'uk'umape. Gyari, mç'k'udi goiğu şeni 3an3a pe.
Berepeşi osteru şeni, k'amp'araşi, purçumaten ot'k'va3inonepe, nez'işi oxarxalonepe, rik'epe. K'inçi oç'opu şeni, bardepe, kandarape, oç'aç'epe, t'avli-n3'eyepe.

Na gomaşinupe hamtepe ren çkva xoloti ko ren, tkvanti gogaşinanşi momiç'arit.
Na p'ç'aripeşi didope ha3'i xoloti ixmaren, hemtepe Lazepeşi kultura ren, hemtepez Lazuri tkvala uğun.

Ma hamtepe kultura çkuni na uçkinanenpez, goşinu şeni p'ç'ari. Ar k'ele ti Ağanmordalepez doguru şeni p'ç'arum. Ma, kultura do nena çkunişi gondunu gurik var emizdams, hemuşeni hamdulya dido oropaten bikom.

Kultura muşi na var uçkinpez, na moxtasen orat mutepeşi var açkinenan.

Xelinadok'aobaten.

21.03.2007, Lazona     

Tanora               

Lazebura.net