Fotoğraf: Nosi

Lazona, Turkiyeşi, yulvaşi k’eleni k’elaz, zuğa-uçaşi tudelen k’ele na ren ar sva ren.

Hem svaz Lazepe, Turkepe do çkva Xalk’epeti skidunan.

Lazona, zuğa-uçaşi p’iciz, mağala germape do zuğaşi ok’ortalaz, dido zenoni na var ren, mteli mt’k’aoni, ncaoni emti, gemti let’ape ren.
Mteli germapeşen didi do ç’ut’a ğalepe gelulun. Lazepeş mteli noğapeti didi ğalepeşi k’elaz gedgineri ren. Lazonaz, germape zuğeşe k’ele golasvareri ren, ham germapeti dido mağala ren. Mağala germapeşi k’un3’ulepez mtfiri jur-sum tutaşen çkva k’at’a oraz ko yodz*in.

Lazonaşi svape, mt’k’ape, onape, ont’ulepe, zenepe, tipepe, k’oçepe, çxovarepe mç’imapeşe, mpulapeşe do keşurişe gyegapineri ren.

Xoloti Lazonaşi t’aroni, dido ini do dido mçxvapa var ren, didoten çuçuna iven.

Lazona mçxvapora, ( Mbuloba, Tutak3ala, Mariaşina ) t’aroni didoten mapxa do mjoroni iven, mç’imati do mç’ims. Lazonaz, enni ç’ut’a mç’ima na mç’ims tuta, Tutak3ala ren. Enni mçxvapa tutati, Mariaşina ren. Ndğalerepe dido mçxvapa, serepeti çuçuna iven. İxeti dido var bars.

Hamora çayişi, ntxirişi, oç’k’omoni lilvepeşi do omçviruşi ora ren. Gele na skidun Lazepeti, Lazonaşe didoten ham oraz mulunan. Lazonaz, ç’andapeti, galendon na mulun Lazepe dido na iven şeni mçxvaporaz iven. Arti, Lazonaz dido k’oçik na oroms daduli3’i şi (atmaca ) şiti ora ren. Xvala hemuşi oç’opu şeni Lazonaşe na mulun Lazepe ti dido ren. Hemtepek Lazonaşe moxtanşi daduli3’işi oçopu şeni ar tuta k’onari germapez do isinapez, skidunan.

Fotoğraf: Nosi

Stveloraz,( Staroşina, Gyuma, Stveli ) coxo na uğun steri, ncalepek, mt’k’apek butk’ape dobğuz do gostveluz ham oraz gyoç’k’aman.  Dido Mç’imapeti omç’imus gyoçkams. Dio oras mtfiriti Gyumazti na mtfums iven. Ndğalerepe çuçuna, sarepez inepe iven. Çayişi orati içoden do irik çayişi gyeç’areri mundez niçasen yado oçvuz ko gyoç’k’ams. Galendon na mulunan Lazepe, na skidunan svapeşe do didi noğapeşe goktinuz ko gyoç’k’aman, Kultura çkuni naren, ntxirişi, lazut’işi mecepeti ham oraz iven.

İnora Lazonaz,( Xristina, 3’anağani,K’undura )mç’imaşi omç’imu do mtfirişi omtfimu enni dido na iven ora ren. Mjoroni do mapxa t’aroni dido ç’ut’a iven. Pat’i do menceloni ixepeti didoten ham oraz bars. Ndğalerepe do serepe didoten ini iven. Mtfiri, na ren Lazonaşi germape do svape dokç’anamz. Jin oput’epez dido mtfiri mtfaşi gzalepeti nik’vaten. Tuta K’unduraz k’at’a oraz mtfiri do mtfums. Mak’inçalepe şeni k’ai iven, hemtepekti k’inçi oç’opu do oilu şeni ham ora çvumenan. Gale duyla na var uğunanenpeşen çkva mitik t’u3a oxorepeşen geleşi inişe dido var gamulunan.

Zuğaşi k’elaz na ren svalepez mtfiri dido var doskidun, ordo do ndğulun.

Pukrinora, ( Mirk’ani, İgrik’a, Pukrinoba ) ham ora, çkimebura bzop’on; Lazonaşi enni mskva ora ren. Pukrinoraz Lazona pukurepete goidadalen, goimskvanen. Ma gamabucoxum mteli sva-mogvaleşi k’oçepez! Moxtit z’irit haşo mskva sva çkar giz’iramunani yado. Pukrinora enni dido Lazonaz nomskvun.

İnepe oçoduz, ndğalepe do serepeti tamo tamo ot’ubinuz kogyoç’k’ams. İxepeti tamo tamo obarus nuonams. Tuta Mirk’anis Lazona, didoten tapala mpulapeten motferi iven. Hemuşeniti ç’ut’a ini iven. ( Mirk’anik nek’naşen o3’k’edapams, bergi do xop’e oç’vapams )

İgrik’az Germape, onape, ont’ulepe, zenepe, naren svape, mt’k’ape, ncape, tipepe ne içkinen mteli perepete oipşen. Perepeşi do pukurepeşi ç’anda iven. Oput’epez, ont’ulepe imolen, ixaçken, getasulepez nergepe dirgen, çayluğepe do ntxirepuna pe ipağen.

Haşoten na moxtasen inora şeni, inora şak’iz na ixenasen dulyape ti ko gyeç’k’en.

Lazonaz skidala, meoneri duyla na var uğunanenpeşen çkva, ar çayi do ar çut’ati ntxirişi gyaç’areriten iven. Ha3’iti ç’ut’a t’az nati kivi şeni irik xepe kogoinz’ikez.  Diopek oput’epez hemtepeşi gyeç’areriten skidun. Dido pesti hemtepeşi gamaçamuten skidala mutepeşi şeni meşvelapu iven.

Edo, Lazonaşi oput’epez gza, elektriği, telefoni, 3’k’ari rennati, inorapez dido Lazi var doskidon, hemtepe mteli noğapeşe gulunan do noğapez skidunan. Oput’epez, gverdala te duyla na ikoman çkva xalk’epeşi k’oçepez nuşkvumenan.

Lazepeşi diope, ha3’iti, noğaşi do jin oput’epeşepe, pukrinoraz do mçxvaporaz ont’ule do onapeşe xoloti ulunan, ç’ut’a t’az nati, skidala mutepeşi şeni muntxanepe xaçkuman. Lazut’i, xaci, lu, şuk’a, merga steri muntxanepe tasuman, ora moxtaşiti hemtepe 3’iloman do oskedinu mutepeşiz nu onaman.

Xoloti Lazonaz, noğaşi oput’epez do jin oput’epez, puci do kotumeşi oskedinuti ikoman. Hemtepeşi mjaşen k’vali, yaği do makvalitenti oskedinu mutepeşiz na unon muntxanepeti eluk’ataman.

Didopeti mamçxomale k’oçepe renan. Hemtepe, ğalişi do juğaşi mçxomepe ç’opuman, gamaçaman, hemuşi gyeç’areriten ti skidunan. Lazonaz, Lazepek mçxomi do mçxomişi gyarepe dido oroman. Hemtepeşi iptneri, zuğa-uçaşi enni na içinapen mçxomi na ren kapça ren

Ham na p’ç’aripe Lazepeşi iriz kuçkin. Edo lazuri nenaten ç’areri mu3’o ivasen, Lazuri  ç’areri muşi dik’itxezdort’un i. Mepşven ko moi3’ondinen.

Lazuri nena çkuni, handğanoraz do na moxtasen orapez oxmaru şeni xe goinz*ikuşi

ora ko moxtu do golilams.

Haya, Lazonaşi sva-oçinapaşi çkinapa ( Coğrafya ) ren.

Xeladok’aobaten skidit Dalepe do Cumalepe.

14.03. 2007   Lazona                       

Tanora