Tanora, aşk`va hako lazuri Xaçka do Nenaşeni nçarums...

Muç`o ret Lazepe!
Delepe, Cumalepe, Megabrepe muç'o ret! Ma ha3'is şkule k'at'a doloniz ham sitez ( lazebura), ham k'elaz Lazuri nana-nena çkuniten muntxanepe o'ç'aru minon.

Çkimi noğaşi nena k'ai na miçkin şeni haşo p'ç'arare. Lazonaşi malte noğapeşi nena, hekoni cumalepe k'onari k'ai var miçkin, mati hemuşeni haşo oç'aru minon.
Hak k'at'a doloniz, Lazonaz, Turkiyez do Sva-mogvalez na ivenpe, 3'oxlenora, handğanora do namoxtasen orape şeniti muntxanepe oç'aru minon. Hamtepe, gonoşine, z'i3'inale, nabz*iripe, na pskidipe, skidalaşi doloxe na iven p'at'inoba, k'ainobape steri muntxanepe ti ivasen.

Lazuri nena do kultura dido p'orom, ham nena do kultura şi gondunu gurik var emizdamz, hemuşeni dido oraşen doni ham duyla k'ala biboder.

Ma xvala, kultura do nena çkuni biozmonam. Mitik hamuşen çkva mutu nosiz mot dolingonomt'az, mot gorumt'az.

Ma, Lazuri nena çkuni do kultura çkuni na oromanpe şeni p'ç'arare. Lazi ren do, Lazuri nena mutepeşi k'ai na var uçkinanenpez, Lazuri nena mutepeşi monzinu şeni p'ç'arare. Lazi ren do Lazuri nena muşi dido var oroms na, Lazuri nena çkuni bo oropina mado pç'arare.

Na p'ç'arumpez, Lazuri tkvala muşi var miçkinna, vanati Lazuri tkvala var uğun na, hemuşi Turkuli muşi p'ç'arare.

Hak isa na var ivupe, na var maxenupe ren na, tkvanti mi3'vaten do irik arte, isa do mtini muşi bz*iraten, hemtepe goşobiğaten do haya isa do mtini ren yado iriz doboguraten. Haya ma xvala var maxenen, artikatiz mebişvelaten heşoten p'aten.

Hak na minon, vanati na minonan duyla, Lazuri nena do kultura çkuni mteli Lazepez ognapu, o3'iru do mo3'ondinu ren.

Hak, haşoten na miçkin k'onari, nena na matken k'onari na moxtasen dolonepez oç'aruz meonu minon. Haya hek'o perpu duyla ti var ren. Ar k'ele oç'aronu mutu z'irare, ar k'ele nenaçkina te ç'arare, arkele mak'itxalepez bo oropinare, ar k'eleti mç'ipenoba muşiten iriz mutu megaçasen. Mu p'a, ma ham gza şeni guri do tişi kuni gebdvi, hamuşen çkva gza var miğun.

Na p'ç'arare tekstepe, na miçkinan albonişi boncapeten p'are. Ora muşi moxtaşi, didopez unonnati, alboni şeni çkva muntxanepeti hemoraz biozmonaten.

Hak, xvala Lazepe şeni p'ç'arum, heya Lazuri nena do kultura şeni ren. Edo ma mteli sva-mogvaleşi K'oçepe do Xelk'epeti p'orom. Edo ma Lazuri nenaten na pç'arum şeni, hemtepek ç'arerepe çkimi var oxa3'onanoren, var ak'itxanoren. Hemtepekti unonan na Lazi megabre re mutepeşiz k'itxan do mupe p'ç'arum oxo3'onan, diguran.

Hak na p'ç'arumpe Lazuri nena k'ai na uçkinanenpe şeni iven. Haşoten gyeboç'k'are do na moxtasen orapez nena çkuni ç'ut'a do k'ai na var uçkinnanpe şeniti muntxanepeti p'are.

K'ai ndğalepe tkvani t'az, Dalepe do Cumalepe çkimi.

Ma Lazi bore, mteli Sva-mogvaleşi k'oçepe p'orom, hemtepekti ma mp'oran.

03.03.2007-Arkabi..                                                        

Tanora