Arşiv  Makaleler Firdevs Periloğlu |
|
Firdevs Periloglu
|
|
18.05.2006 I 22:00 |
 Karmate Mteli xalkepes skidala do gale na ren mutxape icernan. Çhinkape-ti Lazepeşi ocera ren… Çhinkape mitik na var oxmarams, metkhoçeri karmatepe skudunan. Dolobğeri oxorepes, oputepeşan mendra, miti na var ulun ğali phicepes izirenan. Lumci iyas do mjora eşkholva oraşa izirenan. Teni orati miti na var gulun do mamulişi nena na va nunçhuşun soxtanepe ndğaleriti izirenan.
Çhinkape koçis nungvams, xvala kuçxepe kaphula khale gokteri uğunan. Çhinkhape dido mskva do gunze tomalepe uğunan do bazi-ti gunze tomalepe in3xonamtanşa izirenan.
Çhinkape na mo3ondanen koçirtas, oxorcartas nuşfelaman. Khayi çhinkhapek koçis mutu var oğodaman do phiyati çhinkhape-ti khoçi noşkhidaman.
Çhinkhapes oxorunu dido xazi ayenan. İxoronamtanşa miti var naxolinen. Hini şkala xoronis na amaxtasen khoçi çhinkhape steri ixoronasen, çhinkhape mu tkvanen himu-ti him tkvasen. Elakteri thas-na-ti tkvasen, var tkvas-na gombaxunam. Miti na nuucasens koçepeşi iri duxenaman mu na-nagorums.
ÇHINKAPE DO KHANBURI KOÇEPE
Ar oputes ar k`anburi khoçi khortu, khanburi-muşi phanda derdi ayerthu. Ar ndğas oputeşa kogamaxtu do germa kale igzalu. Khanburi-muşite na ulun şeni opşa leba ayu do va gvaktinu.
-“Ham seri hay dobguta do çhumani goviktare ya do iduşunu” do ar mağaras komeşkhaxtu.
Leba do leba çhinkapeşi nenapete goku3xu. Çhinkhapek oxoronu do trağudu kocoçhes. Ar khele ixoronaman ar kheleti:
– Andğa çaçxa ren çaçxa, çaçxa ren çaxça, andða çaçxa ren çaçxa, çaçxa ren çaçxa…” ya do trağudumthes.
Him oras khanburi koçiti keiselu do çhinkhape şkala oxorunu kocoçhu. Him ndğa çhinkhape na trağuduman steri ndğalepeþi çaçxa na var orthu uşkurthu khanburi khoçi do xoloti nena var gamiğu. Hini şkala gamvayonu do mjora eşkaxtu oraşa ixoronu. Çhinkhape ham khoçi dido xazi ayes do khanburi-muşi na derdi ayerthu şeni nuşfeles do keçhopey kaphula-muşişa khanburi do hişote ogzales opute-muşişa. Khoçi kudi n3aşa yethkhoçeri do xeleri xeleri igzalu.
Opute mteli goyişaşes khoçi khanburi-muşişa muçhoii çhitu ya do. Him seris koçişi oxorişa çkva khanburi megabre-muşi komoxtu do merağite uçitxu him khanburişa muçhoşi çhiti ya do. Koçi-ti; “haşo do haşo iyu” ya do gamagognapapu. .
Ar-jur ndğa şikuleti him khoçi khanburi-şkhimi kemiçhopanen deyite imedu do germaşa mendaxtu, çhinkhapes oyondrinu kocoçhu. Xolo leba do leba komoxtes çhinkhape. Xolo kocoçhes oxorunu do trağudu. Him ndğa-ti çhinkape:
- Andğa parask'e ren parask'e, parask'e ren parask'e, andğa parask'e ren parask'e, parask'e ren parask'e…” ya do trağudumthes.
Ham koçiti keiselu do oxorunu kocoçhu hini şkala .
Him ndğa-ti parask'e var orttu. Ham khoçi arti koçi steri hini şkala var elvayonu do dimphonu; andğa parask'e var ren ya do çhinkhape guri komoyonu. Mjora eşkaxtu ora-ti guri moyoneri na-orthes şeni çhinkhape ar khanburi daa komeçes do kaphula khala bethi yuki steri thubi khanburite ogzales khoçi…
Anonim Laz Halk Masalı Composition: Firdevs Periloğlu © Lazebura.Net 2006
|
Bu Yorumu Feed ekle
Yorumlari Göster/Kapat
Yorumlari Göster/Kapat
