 2005 3’anaşi Maryaşina t’u. K’olxoba yado Moleni Sarpis k’ata mapxas na ixenen festivalişa mamç’vet’u. Ordo Batumis trenişen gepti do Sarpişa k’ap’inei bigzali. Zoğap’icis şilya ç’eşidi bandarape do sahnepe t’u gonpinei, gemabiralepek lazuri ibirt’es, kvanç’alastei berepe txozinei-cgiyalei istert’es, meleşen mok’axtimei do mole doxvadinei K’olxepe gonç’elei-gok’omadei isinapamt’es oropa do xelapaşeni. Mskva t’u, dido mskva t’u hem ndğa....
Mp’olişen ar manebra çkimik majurani lazi manebraşi xeten Sarpişa na bak’vandi svarape momincğonu dort’un. Ha3’i mati heya k’oçi bgorumt’i. Muç’oti ivu do var ivu, dobgori do ok’obiçinit. Hemuk 3an3aşen jur svara: Lazuri-Turkuli Nenapuna do Nurdoğan Abaşişişi ‘’Lazuri P’aramitepe’’ coxoni svara kişiğu do komomçu. Dido xelebas kodolobli yani. Var dolumcuşakis Sarpis bikti do ok’ule xoloti treniten oxori çkimişa gobikti. Oxorişa meptişi kodopxedi do svarapeşi goloonus kogeboç’k’i. Nenapuna miğut’u, Mp’olis ep’ç’opi dort’u do himuşi doloxe çkimişeni ağani mutu var t’u, mara p’aramitepe bik’itxişi 3’ori ptkva-na şuri do guri purkinoraş ixi stei xelapaten emapşu! Ğormoti çxomela! Mu mskva do ç’erxvoni nenaten t’u nç’areli! Ek’ule svaras k’apulas men3axei na uğut’u diskiti ebzdi do okunes kodolobdvi. Diskik osinapus gyoç’k’u do ma mu mağodu ha3’i nenaten var itkven. Mcveşi, menceloni cumadepe do p’ap’ulepeşen na misiminapun stei xomaten ar mitxak xon3ustei va gont’k’va3asi?! Tamo-tamo, meoneri-geoneri lazuri ambarepe isinapams mitxani k’oçik do şuris mutxa lo3a do t’ubu, topuristeri diliben. Opale çkimi! Hemoras na ptkvi maartani nenape: ‘’Aferum lazepe, haya mu k’ai mutu dovit doren’’ yado t’u. 
Hayaşk’ule tutape kogolaxtu. Heya svara na nç’aru do diskis na isinapamt’u k’oçi Nurdoğan Abaşişi na t’u kobogni çkva. Mara xolo tutape golulut’uşi, ma ham k’oçi soti va maz’iru, soti va mevagi işte. Var do heya k’ala oçinapuşi nç’ela guris molamik’orut’u şurimşinape çkimi. Ar haya k’oçi k’ala kodopxeda do k’ai gyari op’ç’k’oma, mç’ita ğvini opşva do Lazonaşi doptkva ma do meşvenus bort’i. Edo ğormotik nenape do simadape çkimi var isiminasi? Haya ndğati kododgitu. 2006 3’anaşi Mart’i t’u. Manebrape k’ala t’eleeksp’edi3iaşi dulyape şeni Lazonaşa bulut’i. Edo hek na memişvelat’es k’oçepe bgorumt’i. Hentepeşen ari Nurdoğan cumaditi kort’u. Bulut’işa jur ndğa oğine t’ilifoni bun3’k’iali do: ‘’Nurdoğan cumadi haşo do haşo ivu, Vi3’eşa mebulut do hek tkvani meşvelu mik’oreman’’ya bu3’vişi, nena memik’vatu do: ‘’ç’e mu zop’on! oşveluşi ok’vandinu iveni? Nena do k’ult’ura çkunişeni na iboden k’oçepes va mebuşveli-na ma muperi k’oçi bort’a? Skidala çkimi haya ren işte. Xeleberi moxtit do xeleberi dogxvadat’’yado nena komomçes. Turkiyeşa mek’aptitşi, arçkva t’ilifoni gobun3’k’i do: ‘’çku komoptit. Ha3’i m3ika ora giğunan na ar sotxa ok’obik’atat do dulyape çkunişiti doptkvat ma’’ bu3’vi. ‘’Vi3’es, dudi sok’ağişi çodinas xinci na golaz’in heyas golaxtatşi, maartani var do majurani amaxtimonis kamaxtit do hek Doğanişi dukyani ik’itxat na, na var uçkit’as k’oçi va gaz’irenan’’ya mi3’ves do bidit. Dido goptit do va maz’ires. Ok’ule muk eiselu do xinciş dudişa komoxtu, hek komemages. Mankanaşen gepti do xe kogo3’obuği haya germastei koçis. Dukyani muşişa miç’andes çxonapeik do hek t’at’ape kodomidges, şkamç’ipe k’van3apes çai kodolomibes. Çku çai pşumt’it do hemuk ç’ililişi ambarepe mi3’umert’es. Hantepe zop’ont’uşi ar xes nca okaçut’u do ağani ç’ilili azumt’u. Vitoşi 3’anapeşen doni mcve lazepek na ikomt’es dulya am k’oçik tolepe çkunis ha3’i o3’iramt’u. Bxert’it do nena mexireli busimint’it do bo3’kedit lazepeşi ham didi ust’as.... Ok’ule var memaxondinuşi, ‘’Nurdoğan cumadi, ç’ililis ar lazuri destani gelamiçat na nak’o xeleberi p3’opxat nenaten var itkven’’ ma do vaxve3’i. ‘’Mu tkvala ren, astaxolo’’ yado manebrape muşis ducoxu. Xes ç’ilili kodikaçu do kogyoç’k’u. Gyoç’k’u mara mu gyoç’k’u! Muşi ğormotoni sersiten domi3’ves mteli Lazonaşi xela do ç’vini. Heyvax mu k’ai t’u! Hantepe doboçodinitşi Vi3’es na ren oşvaluşi m3ika pabrik’aşa memaones do lazi oxorcalepek mcveşi adetiten porçape muç’o şuman komo3’ires. Abu-Ulyaşa çkunik’ala moxtu do Begoğlişi oxoris iri k’un3’uli do tarixi muşi k’aixeşa kaemi3xunes. Dgit’u do isinapamt’u. İsinapamt’u ağani do mcveşi, didi do ç’ut’a edo haya k’oçis hak’o solen uçkin ma do goşaşei busimint’i. Mu iven dulya va miğut’as do ar xut ndğa daha kodopskidaşi mteli haya k’oçis uneneli busimina ma do meraği bikomt’i. Lumcis xolo Vi3’eşa kogeptit. Hek gverdi saati çkva dobisinapit do ok’ule ok’obi3’k’it. Mebaşkumert’itşa Nurdoğan cumadik: ‘’Mo gomiçk’endinam e skiri, minç’ari, min3’k’iali do Vi3’eşa xolo mogalu na Ğoncotis musafiri çkimi ivi’’ya mi3’u do igzalu. Çkuti gza çkunis gebaonit do haşo diçodu ar didi p’aramiti. Heyaşk’ule xolo tutape kogolaxtu. Ma oxorişa gobikti do dulyape çkimis mebadvi. Mara Nurdoğan cumadi va gomoç’k’ondu. Va gomoç’k’ondu do va gobiç’k’endini yani. Postaşa kart’alepe buncğonupt’i do t’ilifoniti gobun3’k’umt’i. Na monç’elt’u ambarepe eşap’k’itxupt’i do heyati gon3’k’imeri guriten momçamt’u cuğap’i. Haşo t’u ham mskva p’aramitişi dulya.... Ha3’i haya kart’ali p’ç’arum do ar ambari kogomaşinu. 2005-şi 10 Mayisis Okortueşa Amerikaşi p’rezident’i na ren Corc Buşi moxtu do çkunepek hemus didi dulyaten narges. Doxvadinuşi seremoni Nurdoğan Abaşişişi ‘’Ç’ut’a Ç’ani’’-ten gon3’k’es do haya birapas mesimineri Buşik sahneşa unk’ap’u do hek kogolixoronu! Muk muç’o na zop’ont’u, haya t’u Nurdoğanişi skidalas irişen didi moment’i. Hemuşeni var-ki, Buşis k’ai na a3’onu do na xoronu. Var. Heya oras Buşişi moxtimu mteli dunyak şuroniten mek’oçamt’u do mteli dunyak hem şvacis Nurdoğan Abaşişişi uğurale ‘’Ç’ut’a Ç’ani’’ isimint’u! Haya t’u lazuri nenaşi, lazuri k’ult’uraşi, k’olxuri jenişi xeleba do gecginoba. Ma haşo ma3’onen haya dulya. Didi Ç’ani igzalu.
‘’Ç’ut’a Ç’ani’’ kodoskidu iroteşa.
Komemişkves do igzalu.
İgzalu do guri ç’viniten pşeri komemaşkves n3a do dixa şkas goskiderepe.
Va naxondinu hemuşi guris am skidalaşa.
P’anda Lazonaşeni do Lazonaten na patkalamt’u guris va naxondinu do kododgitu.
Mara coxo muşişi udodginoba do uğuraloba kodomit’ales.
Ç’ut’a Ç’anişi uğuraloba...... Çilambrepe çkuni Nurdoğan Abaşişi şuris cernetişi pirlant’ape steri nan3axas do Ğormotik p’anda te nodginas sapula muşis. Givi G. Karçava 03.04.2008 T’iflisi
|
Bu Yorumu Feed ekle
Yorumlari Göster/Kapat
Yorumlari Göster/Kapat
