Lazonaz pukrinnoraşi iptineri tutape oz’iramu mupez va-ğirs ki? Ar ti beroba çkunişi gonoşinepe… Ey gidi ndğalepe! 3’k’ari steri na-stun do ulun ndğalepe. Beroba-çkuniz na-bz’iritpe berepe çkunişe var momağez. Nak’o t’rik’i no-baz’gana ti k’iyana geykturen. 3’oxlenora çkva xvala guriz elegankanen.
Leksi-mç’aruk mu k’ayi tku doren hoyi…  Noderepe  ivet’u ki; mendraleşen gyo3’k’edaşi duzluğepe  pukurona steri iz’iret’u. Skurepez yamoş sersepe  dolodgitut’u. Ondğener gyariz ti bureğepe iç’k’omert’u k’inoni k’itepete. K’uk’umapete 3’k’arişi ozdu çkun berepeşi dulya t’u helbet.

Lazonaz pukrinora xolo bayami steri mulun xoş. T’aoni m3ika mot’ubaşi ngola da onaz pukurepe  geyxven mtelli ala 3’oxlenuri dulyapeşi çakar nat’u var ixenen ha3’i. 3’oxle dido dulya ivert’u. Berepek ti dulyaz dolexe oxoktut’ez do istert’ez. Pucişi omcvinu zati berepeşi dulya ivet’u. İnoraşen doni dolexe naren pucepek gale gamxtanşi ngenepe-mutepeşi k’ala duzleğepez deli steri cgiyalamt’ez. Mart’işi ortaz na dololamz iptineri cemre şkule 3’k’ari m3ika dot’ubut’u. T’obapeşi k’elapez 3’k’ak’op’li p’ç’opumt’it. Ap’riliş doloxe çkva  3’ip’i nçxomi oç’opuz kogeboç’k’amtit. İpti na-iç’k’omen nçxomepe 3’i3’ilaşi gecginu şeni t’u. Pukrinora şkule Lazonaz çkva dulyaşi ora ren. Doxunoni do dodginoni ora var ivet’u.

Pukrinoraz Lazona xvalak var,  Uçamzuğaşi k’at’t’a savak pukuroms. İxi elabaraşi ngola do onapeşen mupeyi şurape ipirinen. Ala heşşo savape ti ren ki, pukrinora t’azna-ti, yazi t’azna-ti kimi k’oçepe şeni pukrinora çkar var mulun do var ipukuren.  Ey gidi Sebaydin Ali. Sinap’iz molaxert’uşi mupey ozmonupez dololu doren do, skidalaşi opukura stvelora avu doren.

Hak pukurepek var pukurams
K’inçepe var golaputxunan
Murn3xepek var m3kumuloman
Vargolulun ndğalepe.

Guri kok’oma3’k’en k’at’t’a pukrinoraz. Berepeşen pşinaxum çilamrepe çkimi. Mot ognamt’an, mot diguramt’an minon ala var iven. Berepe-çkuniz 3’oxlenora-mutepeşi açkinan. Guri ak’ap’et’an ki, ora muşi moxtaşi mu vanoren uçkit’an. Mapxaşi, pukurişi, mç’imaşi, mjoraşi do sva-mogvaleşi k’iymeti coxo mutepeşi steri açkinan.

Gale t’aroni mapxa rendoren
Elaonaman gelaonaman doren
Ndğalepe 3’k’ari steri stun doren
Var golulun ndğalepe

Eh gidi biç’epe. Çkunisterepe şeni ndğalepe 3’k’ari steri stut’aşi, ndğa navar-goluxtamzpeti t’udoren. Xolo-ti renan, p’andanoraz ti ivasen. Hemtepe şeni ar çkva…

Guriz 3’oxlenuri oropape
Toliz ngolape do onape
Yaliz bo3’k’edaşi bgarape
Var golulun ndğalepe

Selam boğodam hemtepez.. Selam boğodam onapez, ngolapez, mzuğapez. Selam boğodam hemtepez, parangapez, ranz’apez… Çku ora mek’emilez…  3’ana içodon ala medi miğunan. Umedi var iskedinen… umedi var iskedinen.  Mupey kyona tanun, perepeşi tolepeşen… Medi giğut’an dobadona tkvanişen.

Geç’k’apa: Destani.

Leksepe: Sebahattin Ali (Lazuri: Kamil Aksoylu)