Xolo mapxa komoxt’u dort’u. Lazona bort’i, Art’aşeni şk’uni. Seçimi ndğalepe komoyiç’u dort’u. Partipe golaxt’inuşi propaganda ikumt’es. Eni na maseyiru ulkucepeşi MHP haninepe mu gorumt’u? Hini Lazona şeni muperi politika uğutes?

Ar ndğa didinanaşi nusava Cabirişi çili xala şk’ala Art’aşeni noğaşa kogolaft’itu. Xala kçe porça dolokunu xazi na ayet’u komişk’ut’u. Dugunişa ulun st’eri kogixaziru. Dutxeşi abja na culun sva (yeri) golobit’itu.

Andğa bayrami oreni mu iyen?’

96  3’aneri na on ocaği şk’unişi eni 3’ana edveri oxorz’a aseyiru. Zi3ineri gobukti:

Var be didibena, hini şeni irote bayrami oren!’ Xolo guri va duxedu!

Hinişi bayraği gamak’ateri oreni? Şk’uni bayraği mona cobes?

Mu maz’it’en Bayraği mbela na 3’opxes ham ndğalepe…
Lazona xark’işi berepe st’eri umiteli gobit’i. Didi bena komebaxoli:
Ho, be didibena hinişi bayraği gamak’ateri oren’

Gonsk’udu dida oxorz’a:
Muç’o iyen, bayraği ar tane var miğunani çona?’

Didibena muç’ote oxoboktat’u va mişk’ut’u.

Seçimi ndğalepe golilu sum tuta ucepe elemiç’ves. Cur doloni lazona bort’i. Dutxurepe Mesut Yilmazi şeni ixet’es, Lazepe merkez saği na ok’ok’orobu AK parti şeni. Sosyal demokrat’epeşi guri 3’una maz’it’u. Hako Turkiye ort’u do eni solcepe bile milliyetçi iyet’es.

Arti na var oxobo3’oni MHP muperi politika uğut’u Lazona şeni. Hik’u bejğamtes. Sosyal Demokrat’i borertu na it’utes CHP’lepe hinişa va gamik’atet’u.

Mu mazit’en:
Saği soli mant’alu!

Huy merkez saği na celaxen AKP, solcepe na var axenu do3’ulva reformepete xelkepeşi ‘umudi’  diyu. Sosyalist’epe xelkepeşi guri mona var axenes ar biç’itxatu! AK partişi belediyepe golaxt’inuşi duyla ikuman. Hinişa guri molvapute mutu var iyen, daha vorsi politika mi uğun bo3’edatu.

Şku, ti şkuni gobi3’edatu. Xelkepeşi do madulyapeşi guri mona va maxenes. Buç’itxam mteli solcepe, xelk’epeşi ç’umanepe muhafazakarepe moy mebuşk’vitu.?

Edo dalepe do cumalepe;

İri na uşk’un st’eri xolo CHP-MHP koalisyonişa daha vorsi na oren Tayip Erdoğani na cedgasen huçumet’i. Hustera şik’ule sosyalist’epe mu anen, lazepe mu oxenu guri uğunan maz’iranen.
Mehmet Bekaroğlu st’eri ar kçineri Lazi tişineri mona maşk’ves Ankaraşa  biç’itxam.Yat’i Mesut Yilmazi mu axenasen Lazona şeni?

Yat’i mancura bağimsuzi milletvekilepe mutu axenaneni?  Alternatifi ar politik’a mo3’iraneni?

Na ptkvi st’eri, huyneri Turket’i oseyironi oren:

Saği soli mant’alu!

Not. Bu yazi yazar tarafından seçim döneminde kaleme alınmış, ancak bazı aksaklıklardan dolayı elimize geş ulaşmıştır.