|
Daduli3`i (Atmaca) |
|
|
|
Osman Şafak Büyüklü
|
|
18.08.2007 I 15:05 |
 Lazepek dido oraşen doni, didilepeşen ç’ut’alepeşe irik ora-muşi moxtaşi, heya oç’opu, omç’k’u, xes gelaxunu, aliz xe gamasvute na-ixelinen, ot’rik’eşi oras xeşan na-var nit’k’oçen
xor3i-mç’k’omura didi k’inçi şeni p’çarare.
Ham na-ptkvipete mu noren koxo3’onit, mepşven. Haya, bi3’i-muşis mamuli3’i na itkven,
solen do mu3’o moxtu na-var içkinen sifteriti na-itkven, Turkuli-muşi Atmaca na-ren k’inçi ren. Ma hemus mtini coxo-muşi naren Daduli3’i bu3’vare. Vanati mamul do daduli ezdaşi na doskidun 3’i ptkvare.
Daduli3’i dido oraşen doni Lazepeşi ar semboli steri ren, haya ora-muşişen çkva orapesti oxorepes işinaxen. Lazi biç’epe do komolepeşi iris ar fara, ç’ut’a oras t’az nati heya xes
ko-dukaçun. Ar mtiniti, Lazi oxorcalepeşi çkaristi heya çkar xes var-dukaçun.
Ma ha3’i, daduli3’işi oç’opuşen, omç’k’uşe, iri na-miçkin k’onari p’ç’arare.
Daduli3’işi oç’opuşe ipti ğvapaşi oç’oputen geiçk’en. Ğvapa lat’as na-skidun ar 3xovari ren.
Heya oç’opu şeni let’as na-ren ğvap’aşi xeneri ğormapeşe 3’k’ari vana sap’on-3’k’ari doliben do sap’on-3’k’ari tolis na-doluxtams ğvapa, gorma-muşişen ko gamulun do oiç’open. Şkaşen nok’epeten na-nik’oren ğvapa haşoten ğaç’o oç’opu şeni dişinaxen.
Hemindos şkule ğaç’o oç’opu şeni moişaloni ragi dixeziren. Ragis, ğvap’a nok’epeten
ko-nik’oren do moişaloni ragi kogyeidgen, ğaç’oşe mendilen. Haşopeten mt’k’alepunaşa mendilen. Ğaç’oşi kçe do mç’ita peroni na-ren k’ai işinen. Ğvap’a mek’ideri moişaloni ragi geydgen do hek na-isters ğvapa na-z*iroms ğaç’ok, oç’k’omale şeni dido k’ai na-u3’ons ğvapa z*iraşi, heya oç’k’omu şeni ragis ko-meşantxen do na-moişalen ragis ko-meşaskidun do oiç’open. Na-iç’open ğaç’o omç’kus ko gyeiç’ken do ipti ar mskva mogvala bigas kuçxeten
ko-nik’oren. Oç’k’omu şeniti bigas va z*arz*eri mç’ipe k’inçi vanati z*arz*eri nz*eli xor3i k’eik’oren do ğaç’oşi kobra haşoten diz*ğapen. Bigaşen eputxu do xoloti bigaşe goktinus gyoç’k’aşi dimç’k’u iven. Hemindos şkule daduli3’i z*iraşi mot aşkurinet’as, daduli3’i mot z*iromt’as yado tolepeşi jin tk’ebişi motfale ko-niç’aben. Haşepeten ğaç’o, daduli3’işi oç’opu şeni xaziri dixenen.
Daduli3’i oç’opu şeni toli elaç’aberi bigas gyeğuneri ğaç’o, daduli3’işi mosaten, gyari,3’k’ari do çkva mu uk’orsna iri xolo, arabaşi gza var ren-na k’ap’ulapes mok’ideri germapeşe, rak’anepeşe mendilen. Hek 3’oxlenoras xeneri na-ren k’alivepeşe ilinen do na-iğinu k’at’a mutu disvaren. Oncironepe dixaziren, oç’k’omalepe ko gamiğinen do soti-muşepeşis disvaren. K’alivepeşi xolos na-ren mağala, k’at’a k’ele na-iz*iren ar soti çergepedixenen. Çergepe didi bigapeten, ncapeten jin t’ot’i do but’k’apete, vanati hek ko-ren-na limxanapeten k’ai
ko-moitfen ko gyeidgen do iptineri ndğa haşoten golilapen.
Hek ndğalerepes daduli3’işi oç’opu şeni çerges gelixunen do daduli3’i içven, serepesti
na-moiğes oç’k’omalepe do meyvapeti oiç’k’omen, jinti hek na-ikoman çayepeti kyeişven. Ark’eleti na-gololapines 3’oxlenora do na-moxtasen orape şeni, ôxlenoras na-çOpes daduli3’epe şeni nostoneri op’aramitupes ko-gyeiç’k’en.
Majurani dğalepes çergepeşe ilinen do daduli3’işi moxtimu oz*iramu şeni n3aşe oç’k’omilus
Ko-geiç’k’en. Çerges k’ai dit’k’obinen, mosa ko-gyeidgen do ğ’aç’o çergesen gale
Ko-gaminç’en. Oçvus ko-geiç’ken.
Haşopeten ar ora şkule daduli3’i n3as ko-iz*iren, hemoras çerges k’ai dit’k’obinen, ğaç’o
bigaşi jin sterei sterei mteli gale ko-gaminç’en. Daduli3’ik na-isters ğaç’o n3aşen z*iraşi msvape gverdi ok’otferi, ğaç’o oç’opu şeni n3aşen ko-gamik’oren do ğaç’o p’ç’opa yaşi
bigas gexuneri ğaç’o go3’istvinaşi mosas ko-mantxen do ko-melik’oren. Daduli3’i, msva do toma mot gaxvet’as yado tamo mosaşen ko-gamiğen do daduli3’i oiç’open.
Haşopeten jur-sum daduli3’i oiçopen, k’ai na-var gamulun daduli3’epe mosas gamiğanşi oxuşkvinen do k’ai na-gamaxtasen daduli3’i z*iranşi ar k’ai ko-gamimğorinen. Haşopeten malte daduli3’i na-çopumanpes ambari ko-niçen.
Edo hak beciti na ren ar mututi, dido daduli3’i var ç’pare do hemtepeşi skidala var uçodinare. daduli3’işi pe3o var içodasen, daduli3’iz k’ai oç’k’edare, oskedinare. Vanati var ç’pare.
Haşopeten ar-jur dolonis şkule, jur –sum daduli3’i mendilepes melak’oreri germapeşen
ko-geilen do oxorepeşe mendilen.
Daduli3’i na-içkinen steri xor3i-mç’k’omura, mt’k’ori ar k’inçi ren. Heya omç’k’u şeni oxorepes ar mogvala mçxu ncaşi xvani dixenen do hek emk’utaşi, eputxaşi k’uçxeşen
Mek’oreri na-ren şeni şka mot gamulamt’as yado şkaşi oşibaleten ti ko-nik’oren do ncas gelaxunus ko-geigen. Haşopeten k’oçepe k’ala omç’k’us do gyari oç’k’omus ko-geiç’k’apen. Gyariti xor3i mç’k’omureşen moyagas yado makvali oç’k’omus ko geigen. haşopeten
na-ç’opasen k’inçi mot ipxort’as yado meoneri makvaliti ko-niçen.
Hemindos şkule kinçi ç’opumt’aşi mot gondunut’as yado k’udelişi tomapes vanati k’uçxes on3’k’iyaloni ko-nik’iden. Tamo tamo dimç’k’inen do xes gelaxunuşeti ko geigen. Xes gelaxunus na-geigen daduli3’i mç’k’eri daduli3’i diven.
Haşopeten daduli3’i k’inçi oç’opu şeniti va xra3keri k’inçi vanati msva k’vateri kinçi k’ala k’inçişi oçopusti ko-geigen. Daduli3’i ot’rik’e oç’opuşe xaziri ren.
Ham na-p’ç’ari daduli3’iş do oç’opu-muşi dido lazepes kuçkin, edo haya lazuri-nena-çkuniten
Do p’ç’ara-ma ptkvi.
Kultura-çkunişi dagepeşi ari na-ren daduli3’işi oç’opu haşopeten nionasen.
Xelinadok’aobaten skidit Da-Cumalepe. 16.mariaşina.2007 Lazona
Tanora
|
Osman Şafak Büyüklü |
| Yazar Hakkinda: |
| |
|
|
|
Kimler Online
3 Misafir ve 1 Üye Online
Online olan üye yok!
|
Bu Yorumu Feed ekle
Yorumlari Göster/Kapat
Yorumlari Göster/Kapat
