Maotxani ndğas na-ixenu festivalişi ndğa, Vi3’eşi didi oput’e Abus ixenu. Ma, Abuşe
iptineri fara bidi do bz*iri. Xoloti hek Çili do berepe –çkimi k’ala bidit. Hemtepekti ham
oput’e do Lazepeşi mcveşi oxorepe, kultura-muşi z*iran-ma ptkvi.
Abu dido mom3’ondu. Didi, ğalişi k’elaz zenoni, mtk’alepuna, ont’ulepuna, çayluğoni
mskva ar oput’e ren. Lazepeşi kulturaşen na-doskidu mcveşi oxorepe bz*irişi dido
bixeli. Ham oxorepe 3’oxlenoras Abuşi Lazepek na-vezdoren oxorepe rt’u. Oxorepe
hem oraşeni dido k’oçi na-iskedinasen steri didi oxerepe ixenudoren. Na-bz*iri do
na-p3adi k’onarite Lazepeşi mcveşi oxorepe dido rt’u do hakşa na-nuxondu, na-var
geiktu şeni k’ap’et’i xeneri na-rt’u oxi3’onet’u.

Hemtepeşi juris amaptit, iptineri oxori ogyareleşen, xayatepeşe, çeçmepeşen, xaro
do taropeşa iri k’ele ko goptit. Festivalişi organizasyonişi doloxe, mcveşi oxorepeşi
oçinapuşi duyla, T’oroci cumak vu. Hemuk na-goptit oxorepeşi doloxe do gelendoni
na-renpe, hek na-moxtes Lazepes oçinapu. Didi-3’aneripes hamtepeşi dido na-renpe
kuçkit’u, ç’ut’a-3’aneripes do ağan-mordalepes hamtepe var-uçkit’es, varti
z*iresdort’un. Hemtepes, Lazepeşi kulturaşi ha3’i na-ren, ham mcveşi Lazi-oxorepe
na-ren steri oz*iramu do oçinapu dido k’ai ivu.

Abuşe didoten Lazonaşi gale na-skidun Lazepe moxtesdort’un, hemtepek gonç’eloni
Lazona-mutepeşi do kultura-mutepeşi sva-muşis z*ires. Lazonaşi şuras aşures do
Lazonaşi şuri şvanes. 3oxle na-skides lazepeşi oxorepes hemtepeşi mcveşi ora
goişines, hem orapes muç’o skides, mu ç’k’omes, na-ç’k’omespe so gubes, so şinaxes,
so xura ibones, so incires, inoras muç’o t’ubes, pucepe, kotumepe muç’o do so
oskedines, hek hamtepe ozmones. Didopek 3’oxlenoraşi skidalaşe ozmonuten mek’iles
do ozmonuten 3’oxlenoras skides steri ives. T’oroci cumak mcveşi Lazi oxorepeşi gale
na-ren, serentipe, bagenepe, okotumalepe oxoropeşi doloxe na-ren ogyarale, xayati,
didi do çut’a onciralepe, xaro, ntaro, k’eremuli steri muntxanepe na-moxtespes k’at’a
mutu o3’ireri, megureri, dogureri oçinapu.

Hemindos şkule, ok’açxe oçinapu şeni na-goptit ar mcveşi, didi lazi oxorişi oğune
na-moxtespes kok’ibğes. Hek Lazonaşe mendrapeşen na-moxtespe do Lazonaşi malte
noğapeşen na-moxtespek, Lazepeşi kulturaşi oskedinu do kulturaşi meonapa oxenu
şeni hek ives. İrik kultura-çkuni mot-mept’k’omertat, mot-gondunut’as, dido
na-moxtasen orapeşe oyonu şeni haşo etkinluğepe xoloti p’at, tkves.

P’olişen na-moxtes, ipti hek na-bz*iri Dalepe Nena gurubik, Lazuri, Turkuli mskva
birape tkves. Dalepe Nena coxo muşi steri Lazi dalepeşi ok’obğakleten na-ixenu gurubi
ren. Hemtepek lazuri nena-çkuniten dido k’ai ibires, ma do hek na-renpes dido
mo3’ondes.

Hemtepeşi meonas Birolik guda do-barudo gudaşi oç’andinute hek na-ren didi, ç’ut’a
iri xolok ar k’ai Lazepeşi oz*anz*alu di-steres.

Lazepeşi nena do kultura-muşişi madulyalepe, na-biçinom Selma Koçiva-dati hek rt’u.
Xoloti na-biçinomt’i Otanuşi-da do nosi-Cumak kultura-çkunişeni butk’uci steri
duyla-mutepeşi ves. Arti Festivali organize na-vez Birol cuma, Refika da do hek mteli
dulyapeşi tude na-e3’uxtes coxo na-var miçkin da do cumalepes dido mardi boğodam.
Haşo kultura-çkunişi festivalepe xvala, Atina, Art’aşeni do Vi3’es var-do mteli Lazonas
İxenasna k’ai iven. Lazonaşi kultura mteli Lazepeşi ren, Lazonaşi gyulva do yulva var
ren. Lazona mteli Lazepeşi ren.

Tutak3ala.2007 Lazona
 
Tanora