Tanoranin Bahcesinde(Tanora ve Otanusi)

Hemtepe k’ala hakşakis xvala internetişen biçinapamt’it’, Arkabişe mopteten, Arkabi oz*iramu minonan tkvez. Arte na-ok’obitkvit ar sotis artikati hek bz*irit do biçinapit.
Hemtepe Lazuri nena do kultura dido na-oromt’es seni aşvacis Gzamşinepe dobivit. Gzamşinepe k’ala ipti duyla-çkimişe hek dopxedit, na-moxtasen orape şeni mu, muç’o ivasna k’ai ivesen, ağani mordalepes Lazuri nena-çkuni muç’o booropinaten steri dido muntxanepe şeni na-ozmonumtpe ptkvit.

Ok’açxe oxori-çkimişe bidit, hek dopxedit, hek çkimi oxor-skidas, çili do berepe-çkimpe k’ala boçinapi. Ont’ule–çkunis, meyvalepunaşe bidit goptit hek, ha3’i na-iven mç’oxa omuri, m3’k’o-kovali do uçaşi mjoli p’ç’k’omit.

Kemer Köprü

Ham kvaş-xinci dido didi orapeşen doni k’ap’et’i kodgit’u, ar seri mç’ima do n3a xon3uşi ar oras gyektudoren. Hemuşen ç’ut’a oraş şkule kfa na-zdims gza-mxenurak ğalişen k’elaşen gza goloşkvudoren. Hak’o moxvadu muç’o ivu, çkun nosik var emizdes muşeni? Hek kfaş-xinci var gyeiktatuk’o hem gza var golaşkvet’ez do hemuşeni.

Ok’açxe orç’ai ğaliş k’elas elebaonit, takamandeniz kfa na-itaxen, kfaş-ocağepe bz*irit. Hek kfa ebzdaten yado na-ren ncalepe dok’vates, germape na-gyoktes do ğalepe kfaten na-opşes ko bz*irit. Hem ğalis ha3’i kalmaxapesti skidala var axenen.

Bir Laz evi

Noğas mjoras na-gamaptit hak mç’imaşi t’aronis mebiç’opit, ç’ut’a dobişuvit. Hek’o 3’oxlenoras mot geiktet’as k’ap’et’i ivas yado xincepeşi k’uçxepe kfas yodginesdoren. Ha3’i hek’o nosiari var biozmonamt muşeni?

Çkunepek ham xincepeşi surepeteti dido dido moizdes. Hekşen jin na-ren oput’e Orç’işe k’irk’oleri gzapeşen n3aşe ebulurt steri keşaptit. 3’oxle didi oput’e na-ren Orç’iti kobz*irit. Orç’işen, K’amp’anaşi jin gzaşen goktinus kogyeboç’k’it. Jin gzas Lazonaşi mskva germapes bo3’k’edit, melendo na-ren oput’e do germapeşi suretepeti mibizdit. Hekşen enni dido mjora na-ziroms Cgyazenişen kogeptit, heşopeten zenoni K’ordelitişe, mendaptit. 3’oxle noğa na-uğurt’u yak’ovitişi xincişen golobulurt’itşi, ha3’i mcveşi dolobğeri na-ren dukkanepe, oxorepe bz*irişi beroba-çkimişi hem noğa kogomaşinu.

Haşopeten xoloti noğaşe ko gyeptit. Hek Çkunepek, çkun daduli3’i (atmaca) oz*iramu minonan tkves. Mati megabre-çkimepes telefoni boğodi do mis daduli3’i uyonun ko dobiguri. Ar megabre–çkimis şinaxeri daduli3’i uyonut’u. Hemuk şinaxeri daduli3’ik toma goixfumuşi ora na-ren şeni xez na-var dikaçen mi3’vez. Çkunti xvala bo3’k’daden bz*iraten mado megabre-çkimişi oxorişe bigzalit. Megabre-çkimik şinaxeri na-uğut’u daduli3’i-muşi na-oskedinams sotise kamaptit.

Tüy döken atmaca

Megabre–çkimik daduli3’i-şeni na-uçkin iri muntxanepe domi3’ves. Muç’o iç’open, muç’o imç’k’en, muç’o işinaxen, ot’rik’e oç’opus muç’o geyç’ken, toma muç’o goyxfums, iri mutu ko domogures. Haşopeten xoloti duyla-çkimişi hek bigzalit. Hek xoloti megabrepe, cumalepe k’ala dopxedit do Lazuri nena do kultura şeni, Turkiyes ha3’i na-ixenen Didi Goşaonuşiora şeni dido muntxanepe bip’aramitit. Lumci ora na-ivu şeni gzamşine Otanuşi do Nosik çkun ha3’i bigzalat, xoloti na-moxtasen orapes k’aiten biz*iraten yado hemtepe noğaşe mendeboyoni, mankana-mutepeşişi hek mebaşkvi. Hemtepe Vi3’eş k’ele, mati oxori-çkimiş k’ele bigzalit.

Ham Lazona, Lazuri-nena do kultura dido na-oroms, Da do Cuma na-biçini şeni xelineri mebulurt’işi, ham dolonis oç’aroni mutu şeni, na-pskidi Gza-gonoşine do p’ç’arama ptkvi, divu i var miçkin, mepşven komoi3’ondinen.

Hakşen mteli Lazepes do gzamşinepes Selami boğodam.

Tutak3ala- 2007  Lazona

Tanora