Ho… xoloti ko-moxtu Goşaonuşi ora (seçmek zamanı ). Xut 3’anaz ar fara na-iven, dido oras ham orati var içodaşa xoloti na-ixenen Goşaonuşi (seçmek ) oraşa ar tutati var doskidu, xoloti komoxtu ham ora.
Ham Goşaonuşi oras didoten k’oçepe jur k’elen ivenan; ari Goşoonamanpe (seçenler), ariti Goşionanorenpe (seçilecekler ) hemtepeşen çkva Goşionanorenpes na-uğunan meşvelupalepe.
Meşvelupalepe k’at’a Goşaonuşi oras ko-renan. Hamtepeşi dido na-renpe mutu mogu şeni Goşionanorenpes ç’işunan do hemtepe şeni Goşoonamanpe k’orobuman. Hemtepe va moğerdinaman vanati mutu ukadaman do reyi ak’vandenan..
Hamtepeşi dido na-renpeti, Goşoonamanpe k’oçi var-şinoman, xvala ar reyi steri z*iroman. Turkiyes k’itxeri do çkinapa dido na-uğunan k’oçepe dido var ren. Hamtepeşi didopek xvala gazetapes do televizyonis o3’kernan do heşopeten reyi-mutepeşi ixmarnan. Televizyonis do gazetapes gyeç’areri dido na-uğunanpek propoganda axenenan. Gyeç’areri dido na-var uğunpek, gazetas do televizyonis K’oçepe-mutepeşi na-var uğunanpek k’ai propoganda var-axenenan. Goşoonamanpe do Goşionanorenpe; Na-Goşoonamanpe; Hamtepe dido renan, k’at’a oras na-çvumernan çkar mutu var iven, k’ai nenapes do okadupes dido ordo moğerdunan. Partiyapeşi na-vanoren, k’ai na-var uçkinan şeni, hemtepeşi Goşaonuşi propoganda var açkinenan. Hemu şeni reyi-mutepeşi na-içinen didi partiyapes meçaman. Heşopeten na-moxtasen ağani goşaonuşi oraşa xoloti oçvuşen çkva mutu var axenenan. Na-goşoonamenpe 18. vit’oovro 3’aneri t’anoren. Na-Goşionanorenpe; hemtepe didoten dido mogampulapa k’oçepe ren. Hamtepeşi dido na-renpe Turkiye do K’oçinobaşi ok’au şeni var mulunan, xvala mutepeşi skidala ok’au şeni do oçinapu şeni ham dulyas amulunan. Goşionamt’aşakis, goşoonamanpes na-var ukaduman mutu var doskidun. Didopek; oxorişen, arabaşa, duyla na-var uğunpes tutaş-gyeçareri meçamuşe, na-içalişamanpes dido gyeç’areri mepçaten yado dido didi muntxanepe ukaduman. Na-goşionanorenpek, ko-goşionanşi na-ikades çkar mutu var-ikoman. Goşaonu moganşi
na-ikadespe var-do patriya-mutepeşişi didik na-tvasen iri mutu şeni toli genk’oleri ho tkvuman.
Arti k’oçinoba şeni, k’oçinobaşi skidala şeni mutu var-do, xoloti mogamanpalepe şeni muntxanepe ikoman. Aşvaciz, goşionenant’aşi na-tkvespe goç’k’ondunan. Hamtepeti 30. jurneçidovit’ 3’aneri t’anoren.
Hamtepeşi doloxe k’ai k’oçepeti ku-k’atun, iri jin na-ptkvi steri var-renan. Arti na-goşionanorenpek çkunden k’ele na-ivenanpe, irik ar soti bivat yado ok’obğalepe ikoman. Hemtepes Partiya u3’umernan. Hakşa dido Partiyape geidgu, geink’olu. Ha3’iti dido Partiyapek Goşaonuşi oraşa amulunan. Hemtepek dido tkvalapete do okadinupete goşoonamanpes, reyi çkun momçit yado axve3’enan. Partiyapek biçinapat yado bandarape ikoman, goimernan. Ham bandarapes; n3xenişi, but’k’ucişi, mçxomişi, tutaşi, pukurişi, dik’aşi, murun3xişi, ç’angoni steri suretepe gyoxunaman do heşopeten içinapaman. Da-cumalepe; tkvan xut 3’anas na-iven goşaonuşi oras k’oçi işinet. Haya mot gogoç’k’ondut’an. Ham ora-tkvani k’ai ixmarit. Xvala ham oras xe gogintxanoren, ham oraş şkule nuk’usti var-goç’k’edanoren. Hemindos şkule xut 3’ana xoloti na-ixenanenpes o3’k’edaten, çkva mutu var-gaxenanoren. Hemtepeşi didopek xoloti ixiranoren, muşi k’oçepes elo3’k’edanoren, hemtepeşi dulyape vanoren, hemtepes gyeç’areri mogapanoren. Ham goşaonuşe na-amulanan partiyapeşi didope içinen, heşo haşo t’az nati 3’oxle na-vezpetenti içkinen. Na-vanorenpeti çkva mutu na-ivasen var-ozmonum, xoloti na-vezpe vanoren. Da-cumalepe; xut 3’anas ar fara na-mulu ham oras, k’oçinoba şeni, Turkiyes na-skidun mteli Xelk’epes iris k’aoba na-oğodasen, Turkiyeşi galendoni dido menceloni devletepes mek’oreri na-var dut’alasen, mogampulapa do mogampulapa k’ai na-var uğunpes çkva na-var o3’k’edasen, Partiya-muşişi vardo mteli çkva partiyaşi k’oçepes k’aoba na-oğodasen, na-var ixirasen, malte Devletepe k’ala k’ai na-skidasen, m3udi na-var tkvasen, mç’k’omura na-var t’asen. k’oçepe xvala Goşaonişi oras k’oçi na-var şinasen, k’itxeri, çkineri, kulturoni ar k’oçinobas na-munz*inasen, na-tkvupe, na-kadupe na-vasen ar partiya do k’oçepe goşoonit. Ha3’i tkvaten, haşo miti do Partiya reni? Yado… Ma mepşven… miçkin… haşo k’oçepeti ren, Partiyapeti ren. Hak beciti na-ren hemtepe oz*iramu do goşoonu ren. K’ai 3adit, k’ai n3’orit, k’ai n3’onit haya xut 3’anar ar, ar fara maxenenan. Haya ma na-ozmonumpe ren… na-mo3’ondunanorenti ivesen na-var-mo’3’ondunanorenti… Ham goşaonuşi oras na-goşionanenpe k’ai goşoonit… Da-cumalepe! Mbulora. 2007, Lazona Tanora |
Bu Yorumu Feed ekle
Yorumlari Göster/Kapat
Yorumlari Göster/Kapat
