Lazebura | Nenaskani - Lazlarin Internetteki Sesi, Lazca ve Lazlar

Lazuri Ncaraona

Didi Moişvacinora!

Osman Şafak Büyüklü

21.06.2007 I 15:56

Na-golobilit ndğalepes oxor-mguralape (okul ) geink’olu, didi moişvacinora (Dinlenme zamanı) ko-gyoç’k’u. Mteli mamgurapek k’arnepe kyeç’opes do moişvacinora şeni ixeles. Han3’o-ti, k’at’a 3’anas na-ixenen oxor–mguralape şeni 3. sum tuta na-naonasen, didi
moişvacinora xoloti ko geiç’k’u. 9. nçxoro tutaşen doni na-nionet’u mamgura do mamgurapalepeşi doç’k’endinuşi moişvacinu na-ren didi moişvacinora, mteli k’oçepes unonan.
Hemtepeşen çkva, hemtepe şeni ham oras mamgura do mamgurapalepeşi dulyapes meşvelu
şeni na-daç’k’indespes şeniti didi moişvaçinora ren. Hemtepekti ham oraşi doloxe mamgurape
Oxor-mguralaşe oşkvu şeni ordo eiseles, hemtepes gyari, 3’k’ari, dolokunu uxazires, oyones,
moyones do hemtepe k’ala, hemtepe steri artikatis na-nugnams doç’k’endinaşi doloxe skides.
Hemtepesti mamgura do mamgurapalepe steri moişvacinora uk’ors.
Mamgura do mamgurapale dido perpu duyla var ren. Enni ç’ut’a oxor-mguralaşen geiç’k’inen
do didi, mağala oxor-mguralapeşe-şa, enni ç’ut’a 8. nçxoro 3’anaten na-ixenen doğuruşi
geiçk’imu, 15-20. vit’oxut-eçi 3’anapeşe şakisti ixenen. Ham ora ağani-mordale do
mordalapeşi enni mskva 3’anape ren do ham 3’anape iri skidala şeni do k’oçinoba şeni dido
muntxanepe doguruten golulun.
K’oçinobaşi sikadala şeni na-uk’orspe doguruşe na-geiç’k’en do ok’itxu do oç’aru ipti
hek diguren. Oxor-mguralapes mamgurapalepek mamgurapes hek, na-moxtasen orapes k’oçepeşi skidala seni na-ixenasen k’at’a muntxanepeşi iri mutu hek doguraman. Diopek hek na-diguranoren dulyapes nuonaman. Didopekti çkva dulyapes gyoç’k’aman do
hem dulyapeşen na moganorenpete skidunan.
Ha3’i didi moişvacinoras, lazonas na skidunanpe mutepeşi dobadonaşe goiktenan. Hek
3’oxleneri oxor-skida mutepeşis na-renpe k’ala ar 3’ana na-ivu gonç’eloba-mutepeşi
oçodinaman.
Lazonas na-skidunan da galeşen na-moxtespekti, xoloti dobadona-mutepeşişe oxtimus
kogyoç’k’ez. Hemtepekti na-skidunt’es oput’epeşe, didi noğapeşe, didi moişvacinora
gololapinu şeni ulunan.
Dobadona-mutepeşişe na-ulunanpek, hek nana do babape, cumalepe, mzaxalepe,
oput’enepe-mutepeşişi oz*iramu, hemtepe k’ala na-gololapines orapes na-ivupe artikatis
u3’vanoren. Ham didi moişvacinoras Lazonaşe na-mulunan Lazepek oput’e-mutepeşişe, noğa-mutepeşişe idanşi hek, gonç’eloni na-uğunan k’oçepe, oxorepe, svape steri, k’at’a mutu z*iranoren.
Bere rt’eşi na-imçvirt’es ğalepeşe, zuğaşi k’elapeşe ulunan do hek beroba mutepeşi
goişinaman. Ham oras na-iven do gonç’eloni na-uğunan meyvape, t’ot’i-muşis ipxornan.
Ham oraşi doloxe na-iven, ntxiri o3i’lu şeniti ntxirişi ont’ulepeşe ulunan do ntxiri 3’ilioman.
Hemtepeşi o3xunuşi mecepe ikoman do haşoten 3’oxlenoras na-ikomt’es Lazepeşi
Kulturasti nuonaman. Ham oraşi doloxe oxor-skida-mutepeşi do malte-mutepeşis çayişi
o3’ilu steri dulyapesti nuşvelnan.
Xoloti ham oraşi doloxe, malte oput’epe do noğapes na-skidun mzaxalepe do eksalepeti
montfalu do gontfaluşe ulunan.

Lazonas na-skidunanpekti didi moişvacinoras ham na-ptkvipe, hemtepekti ikoman.
Dido Lazepek ok’itkvamando ham oras arte ivenan.
Didoten ç’andape hamoras moxvadinoman. Hek xoloti mendraşen na-moxtespek arte ivenan.
Ham ç’andape ha3’i 3’oxle oxorepes na-ivet’u steri var iven, 3’oxleneri ç’andaşi nostoni çkva
do k’ai iv’et’u, hem ç’andape na-z*irespes heya kuçkinan. Lumci ordoşen na-gyoç’k’ims
ç’andape otanu şak’is naonamt’u. Ha3’i didi salonepes ixenen ham ç’andape, edo hek
Kultura-mutepeşişi ardagi na-ren Lazepeşi oxoronu (oz*anz*alu) gudaşi sersiten
xoloti ixenen. Ham oz*anz*alupes didi, ç’ut’a, irik ak’aten do irik arte sia met’axuman.

Ham oraşi doloxe xoloti omçviruşi ora na-ren şeni, ğalepeşi t’obabes dolibğenan, imçvirnan,
k’almaxape ç’opuman. Zuğapesti xoloti omçvironi soti var doskidunati, na z*iranoren
omçvironi ar k’elas imçvirnan, zuğaşe mçxomişe ulunan do gonç’eloni na-uğunanpe ikoman.

Hak arti Lazonas Lazepe şeni enni beciti na-ren, daduli3’i (atmaca )şi oç’opu şeniti dido
Lazepe dobadona-mutepeşişe ulunan do germapes daduli3’işi oç’opu şeni çergepe ikoman.
Hek na-uğunan k’alivepes beroba-mutepeşi arte na-golaxtu megabre-mutepeşi k’ala
ark’ele beroba-mutepeşi şinoman, ark’eleti daduli3’i ç’opuman, ark’eleti hek na-moiğes
gyarepe, hek na-iven ini 3’k’arepe k’ala ipxornan.
Didi moişvacinoras Lazonas iri xelineri ren.
Mteli k’oçepes tişi do xuraşi k’aoba şeni moişvacinora unon, uk’orsti.

Didi moişvacinora tkvani xelinadok’aobaten gologixtan, da-cumalepe..

Lazona

Tanora