Pagarape:

3'oxle Lazonaz skidala ha3’ineriz çkar var nungamt’udoren. Ağanobak k’iyanaz iri k’oçepeşi skidalaz navudoren makturalobape, Lazonaz ti dovudoren. Lazepez 3’oxleşendoni ham ndğalepeşe namoxtu adeti, moxtana (gelenek) do gegapape uğunan. Ma tkva hamoraz çkva navardoskidu moxtana çkuni “pagara” pe oxogo3’onapaten do gi3’vaten. Beroba çkimiz Lazonaz pagarape ivet’u. Ha3’i sottiksani var doskidu. Tamo tamo namoxtu ağanobapek.do memçinobapek (iletişim) Lazepeşi skidalaz didi okturape vu.

3'oxle k’at’a dulya k’oçişi do xocepeşi mencolobate ivet’u. Lazepeşi dulya pukrinoraz na gyoç’k’at’u, inora şakiz var içodet’u. Pukrinoraşi ipti tutape mart’i do ap’riliz enni didi dulya ont’ulepeşi ontxoru do oxaçku t’u. İnoraşendoni dolexe namolaxet’ez pucepeti pukrinoraşi ipti ndğalepez gale gamişkvet’u. Ont’ulepeşi ontxoru do oxaçkuz xocepe ixmarinet’u ala didopek noderite ntxorumt’ez do xaçkumt’ez. Ont’ulepez k’ayi tipi içanet’u do pucepek k’ayi korba oz’ğamt’ez. Pucepeşi omcvinuz berepez noşfelapamt’ez. Tutapeşendoni molakaçeyi pucepe gale gamaxtat’eşşi ağnosobape ikomt’ez. İpti ndğalepez ağani ngeni mutepeşi k’ala omcuşen dido cgiyalamt’ez. Berepekti pucepeşi oç’işunu do ocgiyalu k’ala t’ayik’omt’ez. Do haşşopeten berepek pukrinoraşi nostoni gamimet’ez.

Ontxoruz var gyoç’k’anşa on’tulepe k’ayi dipağet’u. Go3’oşen nadoskidu lazut’işi ğerepe bergite ik’vatet’u do ik’orobet’u. Ham dulya berepe şeni mtelli osteru t’u. Diido ğerepe ok’obğamt’ez do amun3’amt’ez. Diidi paluroni pagarape ivet’u. Berepek enni didi mişi pagara ivasen yado golaxtina ikomt’ez.Ok’açxeti pagaraşi paluriz mo3’ak’ap’inuşi istert’ez. Pagaraz mo3’uk’ap’amt’anşi “auuu…hihihi” yado gamimğoramt’ez. Lazonaşi k’att’a oxoyişi ont’ulez a-xut-aşi didi pagarape divet’u. Pagarape extat’uşi pucepek ti oşaşeyi oşaşeyi i3’k’edamt’ez ocgiyaluz meçamt’ez. Berepek pagaraşi p’aramiti a-jur doloniz var met’k’omet’ez. Enni didi pagara mişi t’u neneşen nena gulut’u do mtelli op’ut’ez iriz açkinet’u. Kimi oraz ti tidi pagara oxenuşeni martepeşi berepek ok’işfelamt’ez do pagaraz amun3’at’ezşi palurepe meleni do 3’alendoni rak’anepeşen iz’iret’u. Hemindoraz rak’anuyi berepe ok’inç’et’ez do ar do ar mo3’uk’ap’umt’ez.

Lazaonaz ham pagaraşi osteru Kyurtepeşi newruzi k’ala dido ok’ngamz. Hemtepekti paluriz mo3’ak’apinu ikoman do, mo3’uk’ap’amt’anşi çkunepe steri gamixirxinaman. K’iyanaşi yati K’afk’asiyaşi Cuma xelkepe k’ala ok’onok’veti adeti do moxtanape miğunan.

Ey gidi ndğalepe… k’aobate bort’at

Çkimi berobazti okobikoroberttit to livadepez biçişinamtitHandğasteyi mşunz hemdğalepe.Lazutişi ğeyişen obironi tüfeği bikomtit to bibirttit.Arti purkinoraz
Skita parpalepe iyerttu.Hentere yeşili leğenişi pintola tokiz mebukidamtit.Tokiti ar ketiş parçaz mebukidamtit to valeyi parpali mpçopumtit
Heygidi dğalepeBere borttitşa tel şeyi daha kayittu.Lazepeşi oputepez berepeşi oçğirupe ignerttu.Hol moğtaseni hem dğalepe heygidi.tel kaiten doskidit...