LAZURİ UNİVERSİT’ET’İS AMAXTU…

Okorturaş Gamantanuşi do Çkinobaşi Nazirobaş k'elen na iqopinu reformepeşi çodinate, Okorturaşi Mağali Gamantanuşi Doguronepes na igurinen dersepeş met’i 3xunonurot dersepeti kanink'linu. İvane Cavahişvili Tbilisiş Devleturi Universit'et'işi so3ialuri Çkinobapeşi Fak'ult'et'işi maartani k'lasiş mamgurepe muşis, Lazuriş oguramuşi şansi komeiçinu. Am ağodoba şeni mamgurepek dido ixeles. Dersepeşi mtelixolo, Lazuri nenaşi ağanmordale mamgurapale Tea K'alandiak oguraps. Lazuri nena amuş 3'oxle Tbilisiş Devleturi Universit'et'işi Filologia K'atedras igurinet'u. İst'oriaş Fak'ult'et'işi mamgurepekti am şansi maartani fara z’ires.

Gamantanuşi p'rogramis Lazuri nenaş ok'atute Lazuri nena şeni onç’elu dido manz’inu. Majurani k’lasişi mamgurepeşi k’vandaten ilavuri grup’iti iteşkilinu. Entepeşa majurani do masumani k’lasoni mamguralepe, p’olit’ik’aş maçkinalepe, religiaş maçkinalepe, xalk’uri maçkinalepe do majurape ik’ates. Jur grup’is eçi mamgure ren.

Na gyoç'k'u maartani ndğalepeşi dersepek, Lazurişi nenaçkina do metkvalepe muşiş oguramute iqopinet'u. Mara uk'açxe, mtelixolo mamgurepek, Lazurişi folk'lori, ist'oria, xalk'iş çkinoba do çkva argumanepe muşişi mç'ipaşaşi oguru do o3'opxinu ak'vandes. Ar 3'ana şeni xususurot ar oguruşi p’rogrami kageidginu. Am p’rogramis, Lazurişi metkvalepe do nenaçkinaş oğodapa do ist'oruli mordapa muşişi jin dido mç'ipaşaşi kogeidginen.

Dersepes xolo maeçani oş3'anuraşi Lazişi noç'arepe, leksepe, ist'oriuli çkinape igurinen, ist'oriuli-filologiuri 3'opxunape ixvenen, folk'loruli do etnologiuri gamaçkvalepeti koguiçkinapen. Dersepeşi mtelixolo am sakvari şeni xususurot na niç'arinu rexberi do p'rat'ik'uri 3'opxunapeşi şvelate kogamiçkvinen. Oguramuşi 3'anaşi çodinas ar k'onferansi ixvenasunon. Mtelixolo mamgurepek Lazişi folk'lori, xalk'iş çkinoba, ist'oria, k'ult'ura, nena do çkva argumanepe şeni 3'opxa mutepeşi oxo3'onapasunonan.

Tbilisi Devleturi Universit'et'işi so3ialuri Çkinobapeşi Fak'ult'et'işi Oguramuşi Çkinerk'oçepeşi oxo3'onapeten, na moxtasunon 3'anapes Lazuri nenaş jin umosi dido mç'ipaşaşi koguidginasunon. Entepek akvandobaşi monz’inoba unonan. Na moxtasunon 3'anapes am p’rogramişa çkva fak'ult'epeşi mamgurepekti amalasunonan.



http://www.kolkhoba.org/yeha13.htm


[b]