Bazi bazi visimadup, ena mik`ilu 3`anape,
Bere vort`i do virdi, mutu ti varmevagni,
Mu doskidu xe çkimis, resimipeşen çkva.

Hey gidi msudi kiana, ikter, ikter muşeni?
Mişa doskidaginon vargiçkinşi mot ikter?
K`aoba koçişi ren, patiloba mişeni !
İkti msudi kiana, ikti 3`ori oz`iruşeni.

Zuğaşa vulurt`it pirinçluğuşi gzaşen.
Mç`xomi pç`opupt`it Yanumerişi ğalişen.
Mupeyi ndğalepe varmiçkin so gondunu,
Em mordali çkvati mik`iluni Tongelişen.

Visimadaşi nosi mamt`en ,
Sum 3`ana diqu, mtxiri op`3`iluşa varmimalu.
Mendra dopskidi çkini qonapeşa,
Gonç`elei vore ,
Tongeliş qonaşi yamas extumuşa,
Kogeptaşi qini 3`kari oşumuşa,
Upiş şuraten oxoris moxtumuşa,
Gonç`elei vore.
Beroba çkimis bazi seripe,
Mjabupeşi (maqagipeşi) sesi mulurt`u,
Sanki ibiruptes ek`o k`ai murt`u,
Oput`e çkinişi ncapes k`inçepe kort`u,
Ç`umani gomk`un3`xaşi ...
K`inçepeşi sesi mulurt`u.

Mç`ima domç`imuna t`u3a let`aşa,
Çxundis mumaten let`aşi şura,
Hasreti vore a3`i, Emeipeşi tutaşa.
Dağa k`ai tanups , ekonaşi mjora.

Na minon oras (zamani) varmaç`k`omen,
Geşiğeli, xarxaşi, luqu k`ank`ey,
Gomoç`k`ondu zat`i nana çkimişi ga’ri,
Göndğei, 3`a3`ibeli, lobiyaşi k`vanei,
Antepe varpç`k`omaşi, muç`o viqva gvanei..

Ey gidi Ey……….!
Ç`umani keiselaşi,
Ar nefesi şvanaginon t`aronişen,
T`u3a t`u3a 3`iloxta kezdaginon t`ağanişen.
Ondğenei gyariti lauzi mç`kidi k`ala,
Luqu koç`k`omaginon demiri sağanişen.

Muxtaci varviqva yado mitişa,
Geç`ealişeni vidi gurbetişa,
Gurbetis oskidinu dido zoit`een,
Ğormotik mu ç`auna, komulun tişa.

Miçkin ar man varvore, köişen mendra.
Ameripesti k`ai komiğun ndğa,
Belkim bedigo3`veri varvore,
Belkim da didi derdoniti var vore,
Mupa visimadup işte……
Dalepe, cumalepe, Akadaşi, akrabape,
Nana, baba, animsepe, muç`o varvisimada,
Ameripeşen emeripe muç`o varvisimada !

Marmaraşa kodibğen ameripeşi ğali,
Gomoç`k`ondu muç`o ren Uçazuğa’şi xali,
Gumanç`elu köi çkinis na putxun parpali,
Mupa do muç`o vida, varmiğunşi ikbali.

Mupa do muç`o, MUÇ`O VARVİSİMADA!
STVELİ 2002
Timur CUMHUR