ŞEİTHANİ DO AR BADİ

Oş 3hana 3hoxle Sarpis ar badi korthu. Aya badis sum tane bere uqonuthu. Aya berepek baba muşis çkar var meda3hkhethes. Ar dğa aya badik “A3hi ğormotişa vida-minon ya do berepe çkimik na-var medam3hkhenan, dolovutha-minon [şekyaeti voğoda-minon]” ya.
Gzas gedgitu do nithu-şi, gzas ar şeithani komoxvadu do badis, “So ulur?” ya do khitxu. Badik, “Ğormotişa mevulur. Mteli na-mağodupe vutkva-minon. Berepe çkimik var medam3hkhenan” ya-u3hu. Şeithanik, “Ğormoti ma vore. Ma na-gi3hvare qvi. Sin ar didi kyupi keçhopi do odas kododgi. Gale ek gamaxti. Kyupişi jin ar mutu komokhiri” ya-u3hu. Badi oxorişa goiktu. Ar didi kyupi keçhopu do odas kododgu. Phanda [bittum] gale kyupişi doloxe gamithu.
Ar ndğas aya badik en çhitha beres ucoxu do, “Sin ma Khai moğodi do odas ar kyupi okro miğun. Aya sin komekçap. Ama cumalepe-skanis var u3hva!” Ya-u3hu. Aya çhitha bere-muşik sum 3hanas khai komeda3hkhedu.
Sum 3hana çhkhule oşkenani bere-muşis ucoxu do badik u3hu-othi [-ki], “Sin ma khai moğodi do man odas ar kyupi okro miğun. İa sin komekçap, ama cumalepe-skanis var u3hva” ya. Aya oşkenani bere-muşik-ti baba-muşis sum 3hana çkva komeda3hkhedu.
Sum 3hana çhkhule en didi bere-muşis ucoxu do u3hu-othi, “Si man khai moğodi do man odas ar didi kyupi okro miğun, ia sin komekçap. Ama cumalepe-skani var u3hva” ya. Sum 3hana çkva aya bere-muşik komeda3hkhedu.
Sum 3hana çhkhule badi doğuru. Berepek baba mutepeşi odaşa amaxtes do dido imgares. Ekhule manzhagerepek cenaze mindiqones. Berepek xolo dido imgares. Ekhule didi cumak-na-ren tku-othi, “A3hi vimgarit, vimgarit, dubağun! A3hi mteli vigzalat!” Berepe xolo var ides. Ekhule en didi cumak tku-ki, “Man babak mi3hverethu. A3hi ia yebzda-minon ” ya. Majuranik, “Man-ti mi3hverethu” ya. Masumak, “Man-ti mi3hverethu” ya. Cumalepe var okhuveles do mendaxthes hukumetişa!
Em oras hukumeti khadi thu. Khadik tku-ki, “Man-ti pai momçit do kokhogirtupt” ya. Aya kyupi ar ispillis komokhides; kadik kyupis mo3hkhu do ar xe diliğu. Ama xe pisluğiten dvatatu.
Berepek-ti baba mutepeşis phathi na oğodaphthes, konagnes do dido oncğore aqves.

AR MAÇXOMEŞİ BERE
Mçhita çxomi

Korthu ar maçxome [balukçhi]. Amus ar bere kuqonuthu. Ar ndğas aya maçxome bere-muşi khala ğalişe igzalu. Mosa-ti mindiğu. Ğormotis axvamu do igbali bere-muşis konuçkinu do mosa ğalis golinkinu.
Ekho çxomi amastu mosas-ki, zoriten gamatires. Çxomepe ipşerethu. Çxomepeşi doloxe ar mçhitha mskva oxonthaluthu. Maçxomek bere-muşis u3hu-ki, “Man a3hi n3xeni mokiqona-minon, sin aya çxomepes o3hkhedi” ya.
Maçxome n3xenişi moqonuşa idu var idu, akole berek mçhita çxomi yezdu do “ aya mu mskva mutxa ren ” ya. Xe ilusumerthu. Guris, “A3hi amuş oçhopinu yazuği var ren-i? ya. Mevaşkva” ya do ğalis naşku. Çxomik muşi-kae3elaşen jur tane ni3hkhu, beres komeçu do u3hu-ki, “Sin man na-khayoba domoğodi, man aya ker3eli-çkimi mekçap do mutu dulyas na-megaçhiras, ğalişe moxti do aya ukhusvi. Man manişa xolo skani khele kepçkindu” ya. Berek ker3ela kagu3huğu do obas komulidu.

ÇİFÇİŞİ NESİHETİ

Ar noseri çifçi kortheren. Ar ndğas aya çifçi dizhabunu do berepe-muşis ducoxu, “ bğura-minon, zhabuni vore, çkini qonas xazina ren, xaçkat-na, xazina gamulun.” Sum ndğa çhkhule çifçi doğuru; majurani ndğas berepek çapa-ten, bergiten oxaçkus kogyoçhkhes. Mteli qona dontxores do xolo mutu var moşaxtu. Berepek tkves ki, “xaziri xaçkeri ren-şi, çhkhemi komepçat!” Çhkhemi komeçes. Ar 3hanaşi khule lazuthi diqu. Berepek lazuthi gamaçes do geçhareri moges. Ekhule baba mutepeşik na-u3hu, konagnes. Oçalişu ar xazina ren.

AR ZENGİNİ KHOÇİ DO AR ESKİCİ

Mjuraşi toli gextu var-gextu ya-şi, eskicik çhakhuçhi orsis geçhapthu do şarkhi zophonthu. Aya eskicişi oxorişi 3hoxle-ti ar zenginiş oxori korthu. Aya zengini khoçis Axmedis var ancişethu. İncirathukhon-na-ti eskicişi oquruten gokhu3xuthu. Ar ndğas aya zengini khoçik eskicis ucoxu do u3hu-ki, “Sin-ti çkimi steri zengini oqopumu-minon. Kago3hamiği aya jur şilya manati do koşinaxi, gintha-şi ixmari. Ama ar mutxani gi3hva-minon, limcis dido ar qurap!” Eskicis dido khai a3honu do pa3xa-muşişa igzalu. Em seris eskicis var anciru, çhumanişa geçhareri-muşi şunthu. Seri, çhitha nena iqvas-na do khathu 3hiras-na “khathuk geçhareri memixirasinon” ya do geçhareri-muşişi o3aduşa mulurthu.
Aya eskicis ne anciru, ne açalişu, ne-ti abiru, mu şeni-ki, phanda ia geçhareri şunthu. Majurani ndğas geçharerepe yezdu do zengini khoçişi oxorişa igzalu do u3hu, “Aha geçhareri-skani, kago3hamiği, çkimi obiru ma komomçi” ya do eskici pa3xa-muşis komeşaxedu do xolo obirus kogyoçhkhu.