ENESTENI

Ar oxoris sum bozo korthes doren. Bozopeşi enni çhutha dido smkva thu. Didilepes hemuşe athamaxethes. Ar ndğas baba mutepeşi mpholişe uluthu. Didi bozopek muntxa unthes kodandves. Çhuthak:”ma mutu var minon” ya utzu. Baba-muşik : “mu şeni var ginon? Si ti ar mutu komogiğa” ya. Bozok: “xvala mpholis enesteni ren, ar heya kozhiri, çkva mutu var minon” ya. Khoçi mpholişe igzalu. İpti dulya-muşi dovu. Didi bozopes mutxanepekoyuçhopu. Okhaçxe enesteni goru. Var azhiruşi thellali ocoxinapu. Ar genci biçhi komoxtu. “ enesteni ma bore, mot mgorum?” ya. Khoçi goyşaşu : “ bozo -çkimik ha bere mot goru? Pheya sole içinams ?” ya. He bere perişi biçhi thu. Çhutha bozo khala oropey thes. Enestenis: “si bozo -çkimi k ngorums” ya utzu. Enestenik : “bozoskanis ha ntomape komeçi. Unthaşi okhusvas, hemindos ma meptare” ya utzu do cebişen ar xut aşi ntoma keşiğu. Khoçis komeçu.
Khoçi oxo-muşişe moxtuşi iris na-yuçhapu mutxanepekomeçu. Çhuthas-ti ntomape komeçu. Utzu ki:”ha ntomape okhusva-şi enesteni moxtasen” ya. Enni dio çhutha bozok ixelu. Didilepek hemus nozhi3es. “ ntoma mu ğodare? Thaxa muntxa” ya do.. . Çhutha bozo lumcu-şi oda moynkhalu. Ntomape artikatis okhusu. Enestenikomoxtu. Penceres khama gyusu, pencere kogoyntzkhu, kamaxtu. Ar sanduği komuğu dorthun. Dunyas mu khai şeyep ren iri hek dolonsvaruthu. Tanuthu şakis disteres. Dotanuşi enesteni igzalu. Didi bozope goyçhimoşes dorthun : “ hakho mutxanepeso zhiru? Ya tkves. Haşo khatha lumca-şi çhutha bozok ntoma okhusumes. Enesteni mulun, khai mutxanepemumes. Tanutha şakis isternan, xolo igzals. Ar ndğas didi bozopek çves doren : “pheya mik mumes?” ya lumcis enesteni kozhires doren. Dathamaxes doren do penceres sihiri doğodes doren. Enesteni moxtuşi do penceres khama gelusu-şi khama diktu enestenis komathu. “ bozok ma haya moğodathu-i?” ya do di3xiri doberi doberi igzalu. A çkva var ti moxtu.
Bozos derdi davu. Demiyişi kalamani doçhapu, ar çkva demiyişi biga xes kodikaçu. Mpholişe oxtimu şeni gzas kogedgitu. Gyolumcu-şi ar txomuş kyokis kelinciru. Seri izmoce zhiru. İzmoces enesteni phathi zabuni thu. Ar xastanes canthu. şuri çhkhidomthu. Hemoras ar badi komoxtu. Çhutha bozos utzu-ki : “ ha zabunis saği khinçişi guri çare. Tzemindos ikharasen” ya. Bozo gamalu-şi dotanu dorthun. Xolo gzas kogedgitu. Gzas ar khinçi oçhopu. Mpholişe iduşi xastane goru. Enesteni na-canthu xastane kizhiru. Enesteni ğurun ya do miti var amoşkumethes. Bozok dido axvetzu-şi kamoşkves doren. Khinçişi guri enestenis koçu doren. Hemsaathis enesteni dikharu do ha bozo keçhopu. Jurneçi ndğa do jurneçi seri duğuni divu doren. Mati hek borthi. On3oruten 3hkhari bzimithi do khoçepes gebubamthi.

DE CROCHET EN CROCHET..

Ar bozo korthu doren. Nana uğuruşi baba-muşi ar çkva diçilu doren, ayi nana komuyonu doren. Nana şanthiş-muşis muşi khonari bozo uyonuthu do he-ti komoyonu dorthun, ama khatha dulya hamus oxenapamthu. Khatha ndğas ilomthu, ha beres o bgarinuten şuri yalemthu. Nana şanthişişi bozok şa sefa ikomthu. Ar ndğas nana şanthişik hamus ar suley komeçu, puciti ocunu şeni ketzuncğonu. “ ha puci izhğetha şakis ha suley yxvare do landi vare” ya. Bozok muçho vas? Tipepunaşe igzalu. İbgaru ibgaru. Hemoras pucik : “suley nukhu şen momçi, mundişen nokhepe ezdi. Xolo nokhepe nukhuşen momçi, mundişen landi ezdi” ya. Bozok-ti suley na-uğuthu pucis oçhkhomapu. Mundişen nokhepe kogamutoru. Nokhepe-ti nukhuşen koçu, mundişen landi kogamuğu. Puci dizhğuşi oxorişe komoxtu. Nana şanthişi goyşaşu doren: “ hakho dulya muçho gaxenu ?” ya. Hem seris bozos jur teneke lazuthi komeçu. Mtzkhupis karmatheşe ogzalu. “ heya var omkvapa şakis oxoşe vaş komoxta!” Ya. Bozo xolo bgarineri bgarineri do şkurneri şkurneri karmatheşe igzalu. Karmathesçhikhape na-molobğutes kuçkitu. Var idathuna dayaği ipxorthu.. . Karmathes amaxtuşi çhkhapek ixoronthes. Hamus: “ si-ti moxti do bixoronat” ya utzves. Bozok : “ma modvalu var miğun, hamuten var maxoronen” ya. Çhinkhapek : “modvalu komigiğatna dixoroni ??” ya. Bozok : “dobixoron” ya. Çhinkhape ides, bozos ar modvalu komuğes. “ moxti, hatzi bixoronat!” ya. Bozok: “ tzinekhi var miğun” ya, çhinkhape ides, tzinekhi komuğes. Bozok : “porça var miğun” ya, porçati komuğes. “ şarba var miğun” ya, he-ti komuğes. Bozok haşoten ora golaşkumes, khatha şey tito tito moğapams. Çhinkhapek bozok na-goru o3xoci, yali, manto steri mutxanepekomuğes. Bozo xoronişe yoseluşi mamulik kodikhiyu. Dotanu dorthun, çhinkhape goyxires. Bozok lazuthi-muşi domkvapu do oxo-muşişe igzalu. Çhinkhapek na-muğes dorthun şeyepe-ti mendiğu. Nana şanthişi xolo goyşaşu: “ hantepe so zhiri?” ya. Bozok tis na-meyuxtu mutxanepedutzu. Cadi oxorcak ha şeyepe-ti gotzuğu.
“hatzi ar bozo -çkimi mendaxtas, hemus-ti meçanoren” ya. Bozo-muşis-ti lazuthi meçu do karmatheşe ogzalu. Bozo-muşis, nekhnas gamithuşi gamandu: “ si dido khai mutxanepeakhvandi” ya. Bozo karmatheşe iduşi çhinkhapek hamus-ti : “moxti, bixoronat!” ya. Bozok :”ma modvalu, methaksişi porça, şarba, kyurkişi manto momiğit do bixoronare” ya. Çhinkhapek na-goru iri şey komuğes do kelikhlimes. Dido zoy ixoronthes. Bozok: “domaçhkhindu, domaçhu” ya zophonthu. Çhinkhapek var nuucamthes. Bozo oxoronute dostikes, khançapes kogelokhides.
Nana-muşis meraği davu: “ hakşakis muta moxtu? Pheya mutu dağodu-i?” ya. Pencere etzazdu do ucoxu : “ayşeee! Ayşeee!” ya. Çhinkhapek : “ ayşeskani khançaşen khançaşe, thuthulişen thuthulişe!” ya do mokhucoxes. Oxorcas var naxondinu, karmatheşe mendaxtu. Bozo-muşi khancapes gelakhideri zhiruşi ourinus kogyoçhkhu: “ bozo -çkimis mu oğodit?” ya do çhinkhapes komuxedu. Çhinkhapek ha-ti dostikes do khançapes komukhides. Xolo oxoronus kogyoçhkhes. Khançaşen khançaşe, thuthulişen thuthulişe..