AR KHOÇİ N3XENİTE ULUTHU

Ar khoçi n3xenis gexuneri uluthu. N3xeni deli thu. Ham khoçis galeşe oxtimu unthu do dixaziu gextimu n3xenişen. Hemindos n3xeni emkhutu do moycgiyalu do khoçi methkhçu tude. Khoçi okhonağuru do kozhithu. Na goluluthes khoçepek kozhires, 3hkhai gobes do nosişe komoyones. Okhule khitxes-ki: “Mu gağodu ya?” Hemuk u3hu: “N3xenite mobithi do gale galethu, minthu n3xenişen na geptathi. Hemindos n3xeni emkhutu do memthkhoçu. Ha3hi gzas gelabzhi do gale mendapti, va bidi, var miçkin, heya va mşuns

CUMU OXAÇKU

Atinaş kyois onas cumu doxaçkes. Va extu. Jur khonkşepe onaşa ides, aşo gunzhe kholepe kozhies. Kholi eiselu do aris konoxedu. Ha3hi henuk haşo oğodu: “şşgg, hak momoxeduya!” Majurak astolu, khoçi doilu.
A khoçi sum 3hanas molaxethu oxois. Okhule: “Nana, ma handğa onaşa bidare, sum 3hana en molapxe hak”. “Mo ulu, skiri, handğa, dumanli en hava!” “Var, ma bidare!” İdu, doiles. Nanak:
-- O, na gogağare, skiri-çkimia!
“Handğa, dumanli en do mo ulu” na gi3hvidorthun, skiri-çkimia!
-- Ey gidi, uğuthui, uğuthui, gelini-çhkimia? -- Khonkşik u3hu.
-- Va uğuthu, lakin “epçhopare”, ithurthu, gelini-çkimia!

ŞKİT CUMA DO AR DA

Arte skiduthes Lazistanis şkit cuma do uonuthes ar da. Da-mutepeşi dido mskva thu. Arte padişağik biçhik kozhiru haya do naoropu. İdu padişağiş biçhi do du3hu baba-muşis-ki: “Hastey bozos mebaoropi do domoçilia!” Padişağikti u3hu bee-muşis: “Hakho padişağepes mskva bozope uonunan do si illaki hemus mot naoropi?” Biçhik u3hu-ki: “Ya heya momçare, ya ti-çkim philae!” Padişağis aşkuynu do elçepe mendoşku cumalepeşe. Şkit cumalepek u3hves elçepes: “Çku padişağis xisim va bavet”. Elçepek ides do du3hves padişağis. Padişağis guy muxtu do tku: “Oxoy-mutepeşis kvas jin kva va dobuthala/em!” Mendoçku askeyi. Askeepe ides do: “Menceliten bozo ebzdatenya”-şa, cumalepek kogyoçhkhes obaxus hemtepekhala. İyxol doyles do arteği duthales-ki, na u3hvathu padişağis, mu naçhau askeyi-muşis. Padişağik ognuşi haşo dulya, mtel na uyonuthu askey mendoçku xolo. Xoloti cumalepek gyocgines do arteği oxuşkves padişağis ambay na uğathu. Padişağik ognuşi, çkva va uçkithu, mu vathu. Nolu bee-muşis kogyoçhkhu oğarğalus: “Skanişeni hakho askeyi gobondiniya! İgzali, tolep-çkimik va gzhiran do he bozo ginon-na, na ginonstey eçhopi!” Biçhik kezdu silağepe-muşi, gexedu 3xenis kogamaxtu oxoişen. Dido oras goxtu, goxtu do kodolu şkit cumaş oxoişa. Cumalep oxois var thes, bozo xvala thu. Biçhik nokhankhu oxois do bozo gamaxtuşi u3hu: “Musafii kemzdit ar seis”. Bozokti nekhna gun3hkhu do kamoşku. Gyay-gyuy koçu do xethes, iphaamitomthes. Bozos komo3hondu ha biçhi, ama mut va u3hu. Cumalepe-muşi moxtesşi, khay da3hones-ki, musafir khoçi na yen. Doxedes komolepek, xoloti oçhkhomes do oşves. Okhule ophaamitus kogyoçhkhes, meselepe tkves, metkvalape tkves. Mundesti cumalepek u3hves: “A mutu domi3hvit ya”, padişağiş beek du3hu ar meseli. Haşo meseli thu:
“Ar padişağis uyonuthu ar bee, dido mskva var thu, ama padişağiş bee padişağiş bee yen. Arte kozhiyu a biçhik ar bozo, dido mskva thu heya. Ama mututen va yaçhopinu, cumalep-muşis va unthes, padişağis bee sica na avathes.Jur fara murabe ves, ama bozo va yaçhopines. Padişağis guy muxtu do gethkhoçu bee-muşi. Heşoten gamaxtu e biçhi do igzalu. Dido goxtu do gyay amşkoynuşi, kamaxtu ar oxoişa. He oxoi muk na oromthu bozoş oxoi thudoren. Musafii kezdes, gyay koçes do ophaamitus kogyoçhkhes”.
Biçik du3hu hamtepes dulya-muşi do khitxu: “Mu vas ha3hi he biçhik?” heşo tkuşi, didi cumak izhi3inu do tku:” Si mi moğerdinamthi? Komiçkin ha3hi, mi reya!” do u3hu-ki: “Da-çkimik nena komekçu-na, eçhopia!” Khitxesşi da-mutepeşis, da-mutepeşik: “Hoya”, -- u3hu. Hamana doves duğuni do şki ndğas ipxorthes, şumthes. Okhule ides padişağiş oxoişa. Padişağis khay’ da3honu, na-oğodespe duhamamu do dovu didi duğuni. Şki ndğas şumthes, ipxorthes do ibirthes. Okhule şkit cumalepeti kodoskides padişağişis. Hemuşkule he padişağiş askeişen khaphethi mitis va uyonuthu. Zophonan-ki, şkit cuma xoloti skidunan do xoloti na-thestey menceloni yenan. Mi phathobaten mulun hemtepeþe, bgainey igzals, khaobaten na moxtasen zhi3iney igzals.
N3aşen meles sum xami, Ayi duşmaneeş guis kona3onu, majua -- arkadaşis, namuk phath guriten o3hkhers arkadaş-muşis, do masuma -- mik ha meseli başkas va u3humes.